Almatyda qalalyq máslıhattyń hatshysy saılandy

Aımaqtar • 15 Qańtar, 2021

Almatyda qalalyq máslıhattyń hatshysy saılandy

47 ret kórsetildi

Almaty qalalyq ákimdiginde ótken VII saılanǵan Almaty máslıhatynyń birinshi sessııasy barysynda bolyp Stanıslav Kankýrov máslıhat hatshysy saılandy, dep habarlaıdy Egemen.kz

Elvıra SERIKQYZY

Stanıslav Kankýrov buǵan deıin Nur Otan partııasy Almaty qalalyq fılıaly tóraǵasynyń birinshi orynbasary qyzmetin atqarǵan. Onyń partııadaǵy jumysy kezinde azamattardyń 100 myńnan astam ótinishi qaralyp, 70 myńnan astam otbasyna qaıyrymdylyq kómek kórsetildi. Eńbek jolyn 2005 jyly qarapaıym maman retinde bastap, D. Qonaev atyndaǵy ýnıversıtetti zań, al Lomonosov (MBA) atyndaǵy ýnıversıtetti ekonomıka mamandyǵy boıynsha támamdaıdy. Memlekettik tildi jetik meńgergen. 2011 jyldan bastap Almaty qalasyndaǵy Nur Otan partııasynda basshylyq qyzmetter atqarǵan. Sondaı-aq sessııa barysynda Nur Otan qalalyq saılaýaldy baǵdarlamasy men «Almaty-2050» Strategııasyna negizdelgen 5 jylǵa arnalǵan aýmaqty damytý baǵdarlamasy bekitildi.

2021 jylǵy 10 qańtardaǵy saılaý qorytyndysy boıynsha Almaty qalalyq máslıhatyna tórt saıası partııa ótti. Onyń ishinde: «Nur Otan» partııasy máslıhatta 29 depýtattyq mandat, «Aq jol» - tórt, «Aýyl» jáne «Qazaqstannyń Halyq partııasy» - úsh mandat aldy.

Máslıhattyń turaqty komıssııalarynyń sany da jańardy. Eger buryn olardyń sany 6 bolsa, qazir 7 turaqty komıssııa quryldy. Qala ákiminiń usynysy boıynsha ekologııa, týrızm jáne qoǵamdyq keńistikti damytý máseleleri jónindegi komıssııa qosyldy. Strategııalyq josparlaý, bıýdjet jáne tıimdilik jónindegi komıssııany Asqar Bilisbekov, Kólik jáne kommýnaldyq ınfraqurylymdy damytý jónindegi komıssııany Esengeldi Talbıdınov basqardy. Qala qurylysy, turǵyn úı jáne jerdi paıdalaný jónindegi komıssııa Maksım Fınogenov. Armanjan Baıtasov kásipkerlikti, ınnovasııalardy, aqparattyq tehnologııalardy jáne kreatıvti ındýstrııany damytý jónindegi komıssııany basqardy. Sondaı-aq, jergilikti memlekettik basqarý jáne qaýipsizdik máseleleri jónindegi komıssııany Rahat Shımasheva, Áleýmettik-mádenı damý, Jastar jáne qoǵamdyq kommýnıkasııalar jónindegi komıssııany Arman Júdebaev basqardy. Ekologııa, týrızm jáne qoǵamdyq keńistikti damytý máseleleri jónindegi jańa komıssııany azamattyq sektor ókili Altynaı Kóbeeva basqardy.

Almaty qalasy máslıhatynyń tarıhynda alǵash ret depýtattyq mandattar tórt partııaǵa bólindi. Depýtattyq quram 70 paıyzǵa jańardy. Máslıhat hatshysy Stanıslav Kankýrov máslıhattyń eń jas basshysy bolyp, al «Nur Otan» partııasynyń depýtattyq fraksııasyn alǵash ret áıel adam - «Otbasybank turǵyn úı qurylys jınaq banki» AQ basqarma Tóraıymy Lázzat Ibragımova jetekshilikke aldy.

Kúnniń mańyzdy jáne ózekti jańalyqtaryn «Egemen Qazaqstan» telegram kanalynan oqyńyz