Qazaqstan byltyrdan beri saıası modernızasııaǵa bet aldy. Sol jospar aıasynda saıası reformalardyń birinshi paketi qabyldanǵan-dy. Máselen, saıası partııalar, saılaý, mıtıng týraly zańdarǵa ózgerister engizildi. Nátıjesinde, qazir saıası partııalardyń tirkelýi úshin 50 paıyzǵa deıin adam sany azaıyp 20 myń boldy. 2021 jyldan bastap aýyl ákimderin tikeleı saılaý úrdisi bastalady. Prezıdent óz sózinde saıası reformalardyń kezekti paketi júzege asyrylatynyn jarııalady. Máselen, partııalardyń Májiliske ótý shegin 7 paıyzdan 5 paıyzǵa deıin tómendetý usynysy aıtyldy. Bul usynystyń kóp partııalyqty damytýǵa yqpal etetini anyq. Sebebi qazir álemdik normalarǵa, halyqaralyq tájirıbege sáıkes saıası partııalardyń qoǵamdyq ómirge qatysýyna alǵysharttar jasaldy. Sonyń negizi retinde Qazaqstanda kezekti saıası reformalarda jańa zańnamalyq sharalardy qabyldaý qarastyrylyp otyr.
Sonymen qatar jaqynda ótken Májilis saılaýynda qoǵam ókilderi, úkimettik emes uıymdar saılaý úrdisin demokratııalandyrý baǵytynda barlyq deńgeıdegi saılaý bıýlletenderinde «qarsy» degen baǵan engizýdi talap etken bolatyn. Osy baǵandy engizý týraly Prezıdent te atap ótti. Bul óz kezeginde saılaýshylardyń pikiri eskeriletinin ańǵartty. Sonymen qatar Ombýdsmen týraly jekelegen zańnyń qabyldanýy jáne ony ınstıtýttandyrý týraly sóz boldy. Bul azamattardyń quqyǵyn qorǵaýda basty alǵysharttardyń biri bolmaq. Osyndaı zańnamalardyń engizilýi saıası modernızasııanyń basty kórsetkishi deýge bolady. Qazir parlamenttik oppozısııa ınstıtýty paıda boldy. Endi mine ombýdsmen ınstıtýtynyń paıda bolýyna áreket jasaldy. Búgingi tańda el Prezıdenti Qasym-Jomart Toqaev saıası reformalardyń qadam-qadamymen jalǵasatynyn jetkizdi. Prezıdent reformalary shyn máninde júıeli ári dáıekti júrgizilip, «Halyq únine qulaq asatyn memleket» tujyrymdamasy iske asyrylyp jatyr. Prezıdent óz sheshimderinde qoǵam pikiri eskerilgenin kórsetti.
Qazbek MAIGELDINOV,
saıasattanýshy
