Budan bylaı bilim salasyna bólingen bıýdjet qarajatyn ákimshilik retteý mindetin de burynǵydaı jergilikti ákimdikter emes, oblystyq basqarma atqarady. Bul másele Qostanaı oblysy ákimdiginde ótken keńeste qaralyp, bıyl qańtar aıynan bastap kúshine engen «Bilim týraly» zańdaǵy jańalyqtarǵa oraı, saladaǵy qurylymdyq ózgeristerdi júzege asyrý barysy pysyqtaldy.
Keńes barysynda oblys ákimi Arhımed Muhambetov aımaqta 565 bilim berý mekemesi bilim basqarmasynyń quzyryna ótkenin málimdedi.
– Onyń ishinde 489 jalpy bilim beretin mektep, 124 mektepke deıingi mekeme, 43 qosymsha bilim berý mekemesi bar. Osyǵan baılanysty, qazir ádilet organdary quqyq belgileıtin qujattardy tirkeý boıynsha jumys júrgizip jatyr.
Qalalyq jáne aýdandyq ákimdikter jergilikti bilim berý mekemelerine qajetti kómek pen qoldaý kórsetetin bolady. Sonymen qatar, aýdan ákimdikteriniń birqatar quzyreti saqtalyp qalady. Mysaly, jetim balalardy mindetti jumysqa ornalastyrý jáne turǵyn úımen qamtamasyz etý, túlekterdiń jumysqa ornalasýyna kómek berý, aýyldyq jerge jumysqa kelgen jas muǵalimderdi baspanamen qamtyp, turmystyq qoldaý kórsetý mindeti jergilikti ákimdikterge júkteledi.
Jıyn sońynda óńir basshysy qalalyq jáne aýdandyq ákimdikterge bilim bólimderin oblystyq basqarma quzyryna tapsyrý isin merziminde aıaqtaýdy tapsyrdy.
Qostanaı oblysy
