Oǵan elimizdiń ulttyq múddelerin saqtaý, sondaı-aq Qazaqstan men Grýzın baǵytynda jumys isteıtin otandyq tasymaldaýshylar men osy eki el arqyly tranzıttik júk tasymalyn júzege asyrýshylardyń jaǵdaıyn jaqsartý qajettigi sebep bolyp otyr.
Qazirgi kezde tasymaldaý ruqsat etilmese de júzege asyp jatqanyn atap ótken jón. Ol Grýzııa tarapyna, Grýzııada tirkelgen sheteldik kompanııalarǵa naryqtyń osy baǵytynda ústemdik etýine múmkindik berip otyr. Mysaly, 2019 jyly olar jalpy naryqtyń 69%-na ıe boldy.
Ruqsat berý jumystarynyń qaǵıdasy ózgergennen keıin halyqaralyq tasymaldaýda tepe-teńdik ornatý múmkindigi týyndaıdy, qazaqstandyq tasymaldaýshylardyń úlesin ulǵaıtýǵa, sondaı-aq olardyń básekege qabilettiligin arttyrýǵa jol ashylady.
«2007 jylǵy 6 naýryzdaǵy Qazaqstan Respýblıkasynyń Úkimeti men Grýzııa Úkimeti arasyndaǵy Halyqaralyq avtomobıl qatynasy týraly kelisimge ózgerister men tolyqtyrýlar engizý týraly hattamany ratıfıkasııalaý týraly» zań jobasynda bir reıske barýǵa quqyq beretin júkterdi tasymaldaýdyń árqaısysyna jeke ruqsat berý qajet ekendigi kórsetilgen. Sondaı-aq jobada taraptar jyl saıyn bir-birine taýarlardy tasymaldaýǵa arnalǵan kelisimniń qujattaryn jiberetini aıtylǵan. Onda arnaıy blankilerge mór basylyp, ruqsat bergen quzyretti organnyń qoly qoıylýy kerek.
Ekonomıkalyq saıasat, ınnovasııalyq damý jáne kásipkerlik komıteti zań jobasyn Palatanyń qaraýyna engizdi.
