Qylmystyq topty polıseıler «Mal urlyǵy» jedel aldyn alý sharasy barysynda qolǵa túsirgen. Áýlıekól aýdandyq polısııa bólimi bastyǵynyń orynbasary Janserik Hasanovtyń aıtýynsha, byltyr tamyz aıynan bastap aýdan turǵyndarynan mal urlyǵyna qatysty shaǵymdar jıi túse bastaǵan. Osylaısha, polıseıler dereý jedel izdestirý sharalaryna kirisedi.
Jedel izdestirýshiler Novonejın aýylynda turatyn 46 jastaǵy áıel adam basqaratyn qylmystyq topty anyqtady. Qylmystyq toptyń quramynda taǵy 4 adam bar. Olardyń bireýi «Vaz-2107» avtokóligimen aýyl-aýyldy aralap, urlaýǵa bolatyn maldy kózdep ketip otyrǵan. Ekinshisi maldy aıdap áketip, ózderi aldyn ala ýaǵdalasyp qoıǵan jerge jetkizgen. Al qalǵan ekeýi qasapshylyqpen aınalysqan, dedi polısııa podpolovnıgi.
Mysaly, atalmysh qylmystyq toptyń quramyndaǵy 38 jastaǵy kúdiktiniń Shıli aýylynyń mańynda jaıylyp júrgen jylqyny urlap ketkeni belgili bolyp otyr. Polıseıler Shıli, Pervomaı jáne Dıev aýylynan urlanǵan, biraq áli qasapshylardyń pyshaǵyna ilinip úlgermegen birneshe jylqyny ıelerine qaıtaryp berdi.
«Qazir atalǵan qylmystyq topqa qatysty tergeý sharalary júrip jatyr. Qylmystary dáleldengen jaǵdaıda, urylardyń múlikteri tárkilenip, árqaısy 5 jyldan 10 jylǵa deıin bas bostandyǵynan aıyrylýy múmkin», dedi oblystyq polısııa departamenti baspasóz ortalyǵynyń qyzmetkeri Kenje Qonysbaı.
