Aıda Balaeva jastarǵa mınıstrliktiń qazaqstandyq televızııadaǵy sapaly kontentti damytý boıynsha, onyń ishinde qoǵamdy mazalaıtyn jáne erekshe ıdeologııalyq mańyzy bar ózekti taqyryptarǵa arnalǵan serıaldar, derekti fılmder, arnaıy baǵdarlamalar jasaý boıynsha júrgizip jatqan jumystary týraly aıtty.
«Bizdiń mınıstrlik memlekettik tapsyrystyń jáne memlekettik aqparattyq tapsyrys sheńberinde jyl saıyn elýge jýyq telehıkaıalardyń túsirilimin qamtamasyz etedi; al derekti fılmderdiń sany júzden asady. Olardyń keıbireýleri kórermender arasynda tanymal bolsa, kópshiliginiń sapasy, ókinishke qaraı, syn kótermeıdi», - dedi mınıstr.
Sonymen qatar, mınıstr Mınıstrliktiń aldaǵy 2022 jyly túsiretin teleserıaldar men derekti fılmderiniń úzdik ssenarıılerin daıyndaýǵa baıqaý jarııalap jatqanyn atap ótti. «Onyń negizgi taqyryptary mınıstrliktiń saıtynda jarııalanatyn taqyryptyq josparlar tiziminde kórsetilgen», - dedi Aıda Balaeva.
Jalpy, mınıstrmen kezdesýge otandyq qyzyqty jobalardy qurýda tájirıbesi bar 29 jas rejısser qatysty. Aıda Balaeva jas rejısserlerdi dál osy 2021 jyly mınıstrlikke jáne memlekettik telearnalarǵa serıaldar men fılmderdiń jańa ssenarıılerin usynýǵa shaqyrdy.
Is-sharaǵa qatysýshylar mınıstrlikke qazaqstandyq televızııada erekshe, qyzyqty jáne sapaly kontent qurýda jańa jobalar usynýǵa nıetteri men daıyndyqtaryn bildirdi.
