Almaty qalasynyń ákimi Baqytjan Saǵyntaev óziniń Instagram paraqshasynda kitaphanalardy jańartý jáne olardyń bazasynda balalar men jastarǵa paıdaly bos ýaqytty ótkizý ortalyqtaryn qurý týraly aıtty.
О́tken jyly kitaphanalar júıesin jańǵyrtýdy bastap, 10 kitaphana tolyqtaı jańartyldy.
«Qazir bul oryndar shań basqan kitap qoımasy emes, zamanaýı kitap úıine aınaldy. Altynsarın dańǵyly, 37 meken-jaıynda ornalasqan qazaqstandyq jazýshylar kitaphanasyna barǵanymda ákimdiktiń qoldaýymen shyǵarylǵan sóz sheberleriniń basylymy tanystyryldy. Jalpy taralymy 65 myń dana bolatyn 30 túrli kitap qalanyń barlyq kitaphanalaryna taratyldy», - dep jazdy B. Saǵyntaev.
Sondaı-aq qala ákimi Alataý aýdanyndaǵy jańartylǵan №44, Túrksibtegi №26 men №1 kitaphanalarda boldy.
«Kitap saqtaýdyń zamanaýı júıesi ondaǵy bos aımaqty tıimdi paıdalanýǵa, ıaǵnı shyǵarmashylyq, sheberlik synyptaryn, otbasylyq oqý saǵattaryn ótkizýge oryn bólýge múmkindik beredi. Biz kitaphanalardyń jumys ýaqytyn barynsha uzartyp, demalyssyz qyzmet kórsetýine tyrystyq. Kitaphananyń barynsha qoljetimdi ári kelýshiler úshin qyzyqty bolýyna mán berdik», - dep tilge tıek etti megapolıs ákimi.
Osy maqsatta tanymal jáne jas jazýshylarmen kezdesýler, shyǵarmashylyq keshter men taqyryptyq úıirmeler ótkiziledi.
«Jańǵyrtýdan keıin oqyrmandar sany 25%-ǵa, keı jerde 50%-ǵa kóbeıdi. Ásirese, onyń kóbi balalar ekeni qýantady», - dep atap ótti B. Saǵyntaev.
