Aımaqtar • 27 Qańtar, 2021

«Bestikke» engen óńirdegi betburys

14 ret kórsetildi

«Transparency Kazakhstan» halyqaralyq úkimettik emes uıymy júrgizgen áleýmettik saraptama qorytyndysy boıynsha Qazaqstandaǵy sybaılas jemqorlyq deńgeıi tómen óńirlerdiń basynda turǵan alǵashqy bestikke Qostanaı oblysy da enip otyr. Atalǵan uıymnyń uıǵarymynsha, jergilikti azamattardyń 97,6%-y jeke máseleleri boıynsha memlekettik mekemelerge júginý barysynda sybaılas jemqorlyqqa ıtermeleıtin birde-bir zańsyz ıshara-áreketti kezdestirmegen.

Qostanaıdaǵy «Antikor Ortalygy» alańyn­da ótken jyldyń jumys nátıjelerin qory­tyndylaǵan sybaılas jemqorlyqqa qarsy kúres qyzmetiniń basshysy Qýanysh Bekbasov oblys turǵyndarynyń basym kópshiligi bú­ginde ózderiniń kez kelgen jeke máselesin esh­­bir tamyr-tanyssyz nemese alys-berissiz, zań jolymen sheshýge bolatynyn jaqsy bile­tinin aıtty.

Qoǵamdyq indetti joıýdyń eń tıimdi joly – oǵan qarsy ymyrasyz kúres júrgizý. Jeń ushynan jalǵasqan sybaılas jemqorlyq ádette tamyryn tereńge jasyryp, asa qu­pııa túrde jasalatyndyqtan, mundaı qyl­mystardy ashý asa qıynǵa soǵyp jatatyny belgili. Bul jolda sybaılas jem­qorlyqqa qarsy is-qımyl agenttigi qyz­metkerleriniń túrli shym-shytyryqqa boı­lap, kún-tún demeı qajyr-qýaty men bilik-bilimin sarqyp tynymsyz ter tógýine týra keledi.  Máselen, byltyr olar tabandy túrde júrgizgen kúres sharalarynyń nátıjesinde oblysta 62 sheneýnikke qatysty 90 qylmystyq is tirkelgen. Onyń 68-i – jemqorlyq qylmystyń aýyr, al bireýi asa aýyr túrine jatady. Atalǵan qylmystardy tergeý nátıjesinde jemqorlardyń memleket qazynasyna 716,7 mln teńge shyǵyn keltirgeni áshkerelenip, onyń 93%-y, ıaǵnı 663,9 mln teńge óndirilip alynǵan.

Qýanysh Bekbasovtyń aıtýynsha, búginde sybaılas jemqorlyqqa qarsy is-qımyl departamenti jazalaý tájirıbesinen góri qylmystyń aldyn alý sharalaryn kúsheıtip, jemqorlyqtyń sebepterimen kúresýge den qoıyp otyr.

– Aımaqta bas bostandyǵynan aıyrý jazasy ótken jyldarmen salystyrǵanda eki ese azaıdy. Sonymen qatar sybaılas jemqorlyq deńgeıi de eki ese kemidi, – dedi departament basshysy.

Sybaılas jemqorlyqty tek qana zań kúshi­men jazalaý arqyly ǵana túbegeıli joıý múmkin emes. Kópshilik ortany qaýipti in­det­ten arshyp, qulan-taza aıyqtyrý úshin jal­pyǵa qozǵaý salyp, sybaılas jem­qor­­lyqty qabyldaı almaıtyn qoǵamdyq sana qalyptastyrý mańyzdy. Qostanaı oblysynda bul baǵytta da aıtarlyqtaı ilgerileý bar. Mysaly, 2020 jyly jergilikti qoǵamdyq uıymdardyń kúshimen sybaılas jemqorlyqqa qarsy 27 taldaý, monıtorıng sharalary júr­gizilip, nátıjesinde memlekettik qyzmet sa­la­synda jemqorlyq táýekelin týyndatatyn 250-den astam jaǵdaı anyqtaldy. Qoǵam­dyq uıymdardyń oblystaǵy sybaılas jemqorlyqqa qarsy saıasatty júzege asyrýǵa atsalysý belsendiligi jyldan-jyl­ǵa artyp kele jatqanyn atap ótý kerek. Má­selen, oblys­ta júzege asyrylyp jatqan jal­py quny 360 mlrd teńgelik 47 ınvest-jo­bany memlekettik organdar tarapynan bolýy múmkin zańsyz yqpaldy áreketterden qorǵaý sharalaryna departament qoǵamdyq uıymdardy da qatystyryp otyr.

«Halyq únine qulaq asatyn memleket» tujyrymdamasyn júzege asyrý aıasynda búginde Qostanaı oblysynyń qalalyq, aýdandyq ákimdikteri tolyq ashyq qyzmet kórsetý modeline kóshken. Bul úlgi oblys turǵyndarynyń memlekettik qyzmetterdi «bir tereze» qaǵıdaty boıynsha jedel ári eshbir kedergisiz alýyn qamtamasyz etetin ári jemqorlyq táýekeline oryn bermeıtin tıimdi tetikterdiń biri sanalady. 

Sonymen qatar memlekettik organdar qyz­metiniń ashyqtyǵyn qamtamasyz etý jáne memlekettik mekemelerge degen turǵyndar senimin arttyrý maqsatynda oblystaǵy 64 mekeme memlekettik qyzmet kórsetýdiń «OpenSpace» formatyna kóshirildi. Aımaqta 600-ge jýyq ózine-ózi qyzmet kórsetý burysh­tary ashylyp, onyń 130-y aýyldyq okrýgterge ornalastyryldy. Memlekettik qyzmet kór­setýdiń servıstik modeline kóshý úderisi bıyl da jalǵasatyn bolady.

Taǵy bir toqtala ketetin jaıt, aımaqta ashyq bıýdjetterdiń ınteraktıvti kartasy jobasyn engizý máselesi tabysty júzege asyryla bastady. Mysaly, 2020 jyly oblystaǵy 984 memlekettik organ ınteraktıvti karta portalyna tirkelgen. Bul portalda byltyr jergilikti memorgandar men mekemelerdiń jalpy kólemi 420 mlrd teńge bolatyn 4192 bıýdjettik baǵdarlamasy jarııalanǵan.

Q.Bekbasovtyń aıtýynsha, sybaılas jemqorlyq deńgeıiniń tómendeýine oblysta osy baǵytta tıimdi júzege asyrylyp jatqan keshendi sharalar men óńir turǵyndarynyń quqyqtyq saýatynyń jetile túskendigi jáne sybaılas jemqorlyqqa beıjaı qaraı almaıtyn izgi qoǵamnyń qalyptasa bastaýy tikeleı yqpal etip otyr.

 

Qostanaı oblysy

 

Sońǵy jańalyqtar

Teńge qymbattaıdy

Qarjy • Búgin, 17:30

Qazaqstanda 480 adam koronavırýstan aıyqty

Koronavırýs • Búgin, 09:55

«Barys» utylyp qaldy

Sport • 06 Naýryz, 2021

Almatynyń ortasyndaǵy kóshe opyrylyp qaldy

Aımaqtar • 06 Naýryz, 2021

Taraz qalasynda 135 otbasy baspanaly boldy

Aımaqtar • 06 Naýryz, 2021

Jansaı Smaǵulov júldege talasady

Sport • 06 Naýryz, 2021

Eldos Smetov kúmis aldy

Sport • 06 Naýryz, 2021

Oraldyq magıstranttar qazaq ádebıetin oqıdy

Aımaqtar • 06 Naýryz, 2021

«Qaırat» – qola júldeger

Aımaqtar • 06 Naýryz, 2021

Teńiz kenishinde 5 avtobýs otqa orandy

Aımaqtar • 06 Naýryz, 2021

Uqsas jańalyqtar