Memlekettik hatshy atap ótkendeı, bıylǵy jyl Qazaqstan Táýelsizdiginiń 30 jyldyǵy aıasynda ótedi. Demek, Táýelsizdiktiń mereıtoılyq jylynyń bastalýy Memleket basshysy Q.Q.Toqaevtyń «Táýelsizdik bárinen qymbat» atty baǵdarlamalyq maqalasynyń jaryqqa shyǵýymen erekshelendi. El Prezıdentiniń maqalasynda Táýelsizdiktiń ár onjyldyǵynyń tarıhı máni, irgeli bastamalary men Tuńǵysh Prezıdent – Elbasy N.Á.Nazarbaevtyń sheshýshi róli, qazaq memlekettiligin qalyptastyrýdaǵy halqymyzdyń danalyǵy men birligi, eńbekqorlyǵy aıqyn anyqtalǵan. Memleket basshysy Táýelsizdigimizdiń qasıetti qundylyqtary týraly zamanaýı túsinikti tereń ári aýqymdy túrde ashyp, aldaǵy tórtinshi onjyldyqtyń basty maqsattaryn aıqyndady.
Q.Kósherbaev bizdiń qoǵam Prezıdenttiń maqalasyn memleketimizdiń damýyndaǵy jańa kezeńniń ıdeologııalyq tujyrymdamasy jáne baǵdarlamasy retinde qabyldaǵanyn basa aıtty.
Alqaly jıyn barysynda Memlekettik hatshy Q.Kósherbaev belgili akter Sábıt Orazbaevqa Birinshi dárejeli «Barys» ordenin saltanatty túrde tapsyryp, sanaly ǵumyryn teatr sahnasynda ótkizgen akterdi 85 jasqa tolýymen quttyqtady. О́z kezeginde mınıstr Aqtoty Raıymqulova jáne Almaty qalasynyń ákimi Baqytjan Saǵyntaev quttyqtap, mereıtoı ıesine arnaıy syılyqtaryn tapsyrdy.
Elimizdiń ónerine qosqan úlesin baǵalaǵany úshin QR Halyq ártisi, Memlekettik syılyqtyń ıegeri Sábıt Orazbaev alǵysyn bildirip, rızashylyǵyn tanytty.
Jıyn barysynda AQSh-taǵy Dúnıejúzilik kaskaderler akademııasynyń bedeldi «Taurus» syılyǵyn ıelengen otandyq «Nomad Stunds» kaskaderlik tobynyń jetekshisi, belgili kaskader Jaıdarbek Kúnǵojınovqa «Mádenıet salasynyń úzdigi» medali tabystaldy. Bul bedeldi halyqaralyq marapattyń Qazaqstan kaskaderleriniń joǵarǵy sheberligin moıyndaǵany ǵana emes, qazaqstandyq mádenıet pen kıno ónerine qosqan zor úlesi ekenin atap ótti Q.Kósherbaev. О́z kezeginde Mádenıet jáne sport mınıstri A.Raıymqulova kaskaderdiń bul jetistigin elimizdiń mádenıetine qosqan qor úlesi ekendigin atap ótip, aldaǵy isterine de sát sapar tiledi.
Qazaqstan Respýblıkasynyń Tuńǵysh Prezıdenti - Elbasy stıpendııasyn alǵandar qatarynda Ábdijámil Nurpeıisov, Marfýǵa Aıtqoja, Asanáli Áshimov, Nurǵalı Núsipjanov, Aleksandr Garkoves, Dýlat Isabekov, Iranbek Orazbaev, Bolat Aıýhanov, Elena Ábdihalyqova, Mıras Asan jáne basqa da qazaq ádebıeti men óneriniń maıtalmandary bar.
QR Memlekettik hatshysy Qyrymbek Kósherbaev «Memleket basshysy maqalada quzyrly organdar men otandyq telearnalarǵa memlekettik tapsyrystyń belgili bir bóligin mindetti túrde tarıhı taqyryptarǵa baǵyttaýdy tapsyrdy. Bul máselege bolashaqta tarıhshy ǵalymdar, mádenıet maıtalmandary, ásirese, kıno salasynyń mamandary basa nazar aýdarǵan jón. О́ıtkeni ulttyq múdde turǵysynan jazylǵan jáne taspaǵa túsirilgen tól tarıhymyz urpaqtyń sanasyn oıatyp ulttyń jadyn jańǵyrtýǵa jol ashady»,
dep atap ótti. Memlekettik hatshy sonymen birge Prezıdenttiń jyl basynda jarııalanǵan maqalasynyń mańyzdylyǵy jaıynda aıta kele, Táýelsizdigimizdiń 30 jyldyǵy aıasynda uly tulǵalardyń mereıtoılaryn atap ótý máselesine toqtaldy.
Saltanatty qara ary qaraı stıpendıattardyń izgi tilekterimen jalǵasyn tapty. KSRO halyq ártisi, Qazaqstannyń Eńbek Eri, Memlekettik syılyqtyń laýreaty Asanáli Áshimov mádenıet jáne óner salasy ókilderine degen memleket tarapynan qoldaýǵa rızashylyǵyn bildirse, «Egemen Qazaqstan» gazetiniń bólim meńgerýshisi, aqyn Mıras Asan úlken mártebe, zor qýanyshymen bólisip, jastar ádebıetin, onyń ishinde balalar ádebıetin qoldaýǵa kóńil bólý turǵysynda oılaryn ortaǵa saldy.
Memlekettik hatshy osy jıynda memlekettik qoldaý elimizdiń rýhanı negizderin odan ári nyǵaıtýǵa, qoǵamdyq sanany jańǵyrtýǵa jáne Táýelsizdigimizdiń qasıetti qundylyqtaryn nasıhattaýǵa múmkindik beretin jańa ıdeıalar men jobalardy izdeýge jańasha serpin beretinine senim bildirdi.
