Jaman aýyz Maraldy aýylyndaǵy bir úıdiń aýlasyna túsken. Sol kezde mal qamaýǵa shyqqan áıel men onyń 8 jastaǵy balasyna tarpa bas salǵan eken. Qora ishi azan-qazan bolǵanyn estigen otaǵysy qolyna aıyr alyp tura umtylǵan. Qarsy kelgen kókjaldy sol jerde shanshyp óltiredi.
Al qasqyrdyń tisi batyp úlgirgen balasy men jubaıyna alǵashqy medısınalyq kómek kórsetilip, aýdandyq aýrýhanaǵa jetkizilgen. Túz taǵysy saraptama úshin veterınarııa zerthanasyna jóneltilgen.
Aýyldyqtardyń aıtýynsha, bir apta buryn taǵy qasqyr kirgen eken. Balalary úshin úreılengen halyq aýyldaǵy eki aýsymmen oqıtyn sabaqty tek tańerteńge aýystyrýdy ótingen. Aýdandyq bilim bólimi birden turǵyndardyń ótnishin oryndady. Al zardap shekken balasy men anasy aýrýhanada jatyr.
