Oqys oqıǵalardan keıin jaýapty mekemeler qańǵybas ıtterge qarsy kúres sharalaryn jandandyra bastady. Úırenshikti ádet. Shı shyqpaı, shara qoldanylyp, kóńil aýdaryla bermeıdi. Áıtpese, Kókshetaý qalasynyń shetki aýdandary turmaq, ortalyǵynyń ózinde qarǵybaý taǵylmaǵan, tumyldyryq kıgizilmegen ıesiz ıtter úıir-úıirimen qańǵyp júr.
– Aýyl turǵyndaryna ıtterine ıe bolýy kerektigi jóninde áldeneshe ret eskerttik. Bul joly mektepten kele jatqan inisin qarsy alýǵa shyqqan oqýshy qyzǵa qańǵyrǵan ıtter bas salǵan, – deıdi Krasnoıar aýyly ákimdiginiń bas mamany Janat Áýbákirov, – adamǵa aýyz salǵan soń qutyrǵan dep kúmándanýǵa da ábden bolady. Qazir mán-jaı muqııat tekserilýde.
Shalǵaıdaǵy eldi mekenderde bul máseleniń qanshalyqty sheshilip jatqandyǵy belgisiz. Jaman indet jaılaǵaly qarǵa adym jer uzap shyǵýǵa qaımyǵatyn aýyl turǵyndary «bas jarylsa – bórik, qol synsa jeń ishinde» dep júre berýleri de múmkin. Oblystyq balalar aýrýhanasyna byltyr ıt qapqan 156 bala medısınalyq kómek alýǵa júgingendigi sonyń aıǵaǵy bolsa kerek. Bıylǵy jyly osyndaı úsh oqıǵa oryn alyp otyr.
– Krasnoıar aýylynan jetkizilgen oqýshy qyzǵa alǵashqy kómek kórsetildi. Qutyrý aýrýynyń aldyn alýǵa ekpe egildi, – deıdi travmatolog dáriger Sergeı Výrs.
Degenmen ıesiz ıtter talaǵan júzdegen balanyń júregi shaılyǵyp, júıkesine salmaq túspedi kim aıta alar?! Qazir kózi shalǵandardyń aıtýyna qaraǵanda, buralqy «dostardyń» qalanyń jeke sektorlarynda, ásirese Krasnoıar aýylyndaǵy burynǵy et kombınaty, oblys ortalyǵyndaǵy Jaılaý jáne Zastansıonnyı shaǵyn aýdandarynda tym kóbeıip ketkendigi belgili bolyp otyr. О́kinishke qaraı, taıaýda osy shaǵyn aýdandarda qańǵybas ıtterdiń adamǵa shabýyl jasaýynyń eki oqıǵasy tirkelipti.
– Kóz baılana úıge qaıtyp kele jatqanymda, taıynshadaı eki alabaı ıt tap berdi,– deıdi qańǵybas ıtten zardap shekken qala turǵyny Turar Maǵzumov. – Jan ushyryp qorǵanýǵa tyrystym. Mundaı jaǵdaı birneshe ret oryn aldy. Árbir oqıǵadan keıin tórt ret shaǵymdandym. Biraq eshqandaı nátıje shyǵatyn emes. Kórshilerime de «ıt baqsań, ıe bol» dep eskertkenmin. Olar da jurt sózin eskerer emes. Onyń ústine qańǵybas ıtter qaptap júr. Tún túgil, kúndiz úıden shyǵýdan qaldyq. Bárimiz de bala-shaǵa baǵyp otyrmyz ǵoı.
– Krasnoıar aýylyndaǵy oqıǵanyń ornyna birden jettik, – deıdi qalalyq polısııa basqarmasynyń ınspektory Altynbek Búkenov. – Qabaǵan ıtterdiń ıesin taýyp, ákimshilik jaýapkershilikke tarttyq.
Biraq munymen másele túpkilikti sheshile qoımaıtyndyǵy belgili. Endigi arada qala ákimdigi qańǵybas ıtterdiń qaterin qaperge alyp, naqty bir shara qoldaný qajet tárizdi.
Kókshetaý
