Amandyq Batalovtyń qabyldaýyna kelgen Talshyn Týktynova eki bala tárbıelep otyrǵan jalǵyzbasty ana, al Aıgerim Jolamanovanyń múgedek balasy bar. Turmys taýqymetin bir kisideı kórgen analar kómek surap ákimdikke buǵan deıin de kelgen. Qala ákimdiginiń keńesimen «Asyl analar» qoǵamdyq qoryn quryp, ózderi bas bolyp kómekke muqtaj analardy qatarlaryna tartqan. О́tken jyldyń qarasha aıynan beri óz jumysyn bastaǵan qor qazir 300-den astam analarmen qarym-qatynasta.
- Biz búginge deıin demeýshilerdiń kómegimen 100-ge jýyq otbasyǵa kómir-otyn, azyq-túlik, kıim-keshek jaǵynan kómek kórsettik. Bul jumysty odan ári de jalǵastyra beremiz. Degenmen bizdiń kóp balaly analarymyzdyń qolynan kelmeıtin is joq, shetinen ónerli. Sondyqtan biz «Qashanǵy kómek surap ómir súremiz. Qolymyzdan keletin bir is bastap, analardy da sol sharýaǵa tartaıyq», - dep aqyldasqanda, árbir áıel óziniń qolynan keletin ónerin ortaǵa salyp jarııalap kórsetti. Sodan biz aqyldasa kele tigin sehyn ashsaq degen qorytyndyǵa keldik. Osy jaǵynan bizge qoldaý bildirseńizder, dedi Talshyn Týktynova.
Al Aıgerim Jolamanova ákimdikke kómek surap kelgennen keıin joldasy «Atameken» kásipkerler odaǵy arqyly jańa mamandyqqa oqyp, 550 myń teńge grant utyp alǵan. «Qazir avtokólikterge tehnıkalyq qyzmet kórsetetin oryn ashýǵa nıettip jatyrmyz», dedi ol.
Sol sııaqty buryn turaqty tabysy joqtyqtan memlekettik baǵdarlamamen úı alýǵa múmkindigi bolmaǵan otbasy qazir «Baqytty otbasy» baǵdarlamasy arqyly baspanaǵa qol jetkizgen.
- Qandaı qyndyq kórsem de moıymaı, alǵa qoıǵan maqsattaryma birte-birte qol jetkizip kele jatqan meniń jeke tájirıbem kóptegen analardyń úmitin oıatty. Memleket tarapynan kórsetiletin qoldaýlarǵa qol jetkizý jaǵynan keńes surap, jol kórsetýimdi ótinip jatady. Múmkindiginshe memlekettik qoldaý sharalaryn alýǵa baǵyt-baǵdar kórsetip júrmin, dedi A.Jolamanova.
Oblys ákimi analardyń osyndaı usynystary boıynsha qabyldasa dep suraǵanyn estigende qýanǵanyn aıtty.
- Sizderdiń bastamalaryńyzǵa, is bastasaq degen talpynystaryńyzǵa rıza bolyp otyrmyn. Memleket tarapynan biz kóp balaly analarǵa, az qamtylǵan otbasylaryna árqashan qoldaý kórsetip kelemiz. Tigin sehyn ashsaq degen nıetterińizge biz barlyq jaǵynan járdem jasaımyz. Eń aldymen qalada bos turǵan ǵımarat bar ma, sol jaǵyn qarastyrýymyz kerek. Sodan keıin «Jetisý» áleýmettik-kásipkerlik korporasııasy arqyly tigin mashınalaryn, basqa da qajetti qural-jabdyqtardy alyp beremiz. Keıin sehtyń ónimderine tapsyrys beretin mekemelermen jumysty úılestirýge de qolǵabys jasaımyz. Eń bastysy, - oıǵa alǵan isterińizdi bastaý. Bir bastalǵannan keıin birte-birte irgesin keńeıtip, qatarlaryńyzdy kóp balaly analarmen tolyqtyra beresizder. Qajet bolsa, jumyspen qamtý ortalyqtary arqyly da mamandar alýlaryńyzǵa bolady, - degen Amandyq Batalov orynbasary Batyrjan Baıjumanovqa, «Jetisý» ÁKK basshysy Rýslan Qojasbaevqa, jumyspen qamtýdy úılestirý jáne áleýmettik baǵdarlamalar basqarmasynyń basshysy Marjan Muratqa, Taldyqorǵan qalasy ákiminiń orynbasary Sáýle Arzabekovǵa osy isti erekshe nazarǵa alyp, tıisti máselelerdiń barlyǵyn sheshýdi tapsyrdy. Analardyń bastamalaryna, isterine sáttilik tiledi.
