Elordada «Báıterek» monýmenti men «Han Shatyr» SOO, Almatyda – «Halyq Arena» sport jáne mádenıet saraıy, «Almaty Arena» muz saraıy, Abaı atyndaǵy Qazaq memlekettik akademııalyq opera jáne balet teatry, Renion Park qonaq úıi men MEGA Alma-Ata SOO-daǵy Happy Eye sholý dóńgelegi kók tústi shamdaryn jaǵady.
Aksııanyń bastamashylary Qazaq onkologııa jáne radıologııa ǵylymı-zertteý ınstıtýty (QazORǴZI), «Qaterli isikpen kúreseıik» qoǵamdyq qory jáne Takeda bıofarmasevtıkalyq kompanııasy qoǵamnyń nazaryn osy jahandyq problemaǵa aýdarý jáne halyqty keseldi erte anyqtaýǵa jáne emdelýge shaqyrý, búgingi órkenıettiń eń aýyr dertteriniń biri retinde jurtshylyqtyń qaterli isik týraly habardarlyǵyn arttyrý maqsatynda is-sharany júzege asyrdy.
- Búgingi onkologııa alǵa qaraı qadam basty. Qazirgi tańda 10-15 jyl buryn emdeý múmkin bolmaǵan keselderge em bar. Onkologııalyq aýrýlardy emdeýdegi álemdegi aldyńǵy qatarly ádistemeler ıgerildi jáne olar Qazaqstanda belsendi qoldanylady. Osynyń barlyǵy tegin emdelýge muqtaj árbir azamatqa tegin medısınalyq kómektiń kepildik berilgen kólemi sheńberinde qoljetimdi. Alaıda, uzaq ýaqyt emdelýden arylýǵa jáne tipti ómirdi saqtap qalýǵa múmkindik beretin eń mańyzdy faktor – turaqty onkoskrınıng pen aýrýdyń erte kezeńderinde azamattardyń júginýi, - deıdi «Qazaq onkologııa jáne radıologııa ǵylymı-zertteý ınstıtýty» AQ Basqarma tóraıymy Dılıara Qaıdarova.
Qazirgi ýaqytta Qazaqstanda jetekshi onkologııalyq qaýymdastyqtardyń halyqaralyq hattamalaryna sáıkes keletin onkologııalyq aýrýlardy emdeýdiń qazirgi zamanǵy túrleri júrgizilýde. Targetti terapııa, ımmýnoterapııa jáne gendik ınjenerııa ádisteri belsendi qoldanylady. Barlyq hımıoterapııalyq jáne targettik preparattar tegin medısınalyq kómektiń kepildik berilgen kólemi (TMKKK) sheńberinde qamtamasyz etiledi. 2010 jyldan bastap súıek kemigin transplantasııalaý júrgizilýde. 2012 jyly Qazaqstanda onkopsıhologtardyń jeke kásibı qyzmeti paıda boldy.
Mańyzdy jetistik retinde aýrýdyń satysy men taralýyn dál anyqtaýǵa, emdeýdiń ońtaıly rejımderin tańdaýǵa, jeke terapııany qoldanýǵa, sáýlelenýdiń nemese hımıoterapııanyń ońtaıly kýrsyn taǵaıyndaýǵa, emdeýdiń tıimdiligin baqylaýǵa jáne negizsiz operasııalardy boldyrmaýǵa kómektesetin MRT jáne PET-KT dıagnostıkasyn, molekýlalyq-genetıkalyq zertteýler men telepatologııany engizýdi aıtýǵa bolady. Onkologııalyq aýrýlardyń erte belgilerin anyqtaıtyn jáne anyqtalǵan aýrýlary bar pasıentterge alǵashqy kómek kórsetetin emhanalardyń qyzmetkerleri úlken jumys atqarady. Onkologııalyq aýrýlarmen kúresýdiń Keshendi jospary aıasynda qaterli isiktiń keń taralǵan túrlerimen aýyratyn pasıentterge úıde pallıatıvtik kómek kórsetý boıynsha mobıldi toptardyń jumysy bastaldy.
Sonymen qatar, qazaqstandyq naýqastar pasıentterge arnalǵan mektepter formatynda qorqynyshty dıagnoz týraly bilgen pasıentterdegi aqparattyń jetispeýshiligi máselesin sheshýge ǵana emes, buǵan qosa terapııaǵa tózimdilikke baılanysty psıhologııalyq jáne áleýmettik problemalar men máselelerdi sheshýge kómektesetin qoldaý baǵdarlamalaryna qol jetkize alady. Qoǵamdyq uıymdar men áleýmettik jaýapty bıznes bul jumysta onkologtarǵa baǵa jetpes kómek kórsetedi.
- Bizdiń mıssııamyz – qaterli isikpen aýyratyn naýqastardyń ómirine arasha túsý jáne ómir súrý sapasyn barynsha jaqsartý úshin búkil qoǵamnyń kúsh-jigeri men áleýetin biriktirý, - dep atap ótti «Qaterli isikpen kúreseıik» QQ atqarýshy dırektory Gúlnar Kýnırova. - Biz ýaqytyly belsendi birlesken is-qımyldar qazaqstandyqtardyń erteńgi urpaǵynyń densaýlyǵyna osy aýrýdyń qaýpin aıtarlyqtaı azaıtady dep senemiz. О́z densaýlyǵyńa dárigerler jáne memleketpen birge jaýapkershilikpen qaraý – bul árbir adamnyń oryndaı alatyn mindeti: skrınıngterge qatysý, salaýatty ómir saltyn ustaný jáne pozıtıvti oılaı bilý, óziniń habardarlyǵyn arttyrý arqyly mıfterden arylý – osynyń barlyǵy kez-kelgen qazaqstandyqtyń qolynan keledi.
Jyl saıyn Qazaqstanda qaterli isik aýrýynyń 36 myńǵa jýyq jańa jaǵdaıy tirkeledi. Onkologııalyq esepte 180 myńnan astam qazaqstandyq tur.
