«О́zderińizge belgili, 2 qańtarda Pavlodardaǵy qıyn jaǵdaıǵa tap bolǵan balalardy qoldaý ortalyǵynda qaıǵyly jaǵdaı boldy. 3 qyz ýlanyp, bireýi kóz jumdy. Ol ata-anasynyń qamqorlyǵynsyz qalǵan qyz. Ata-anasy quqyǵynan aıyrylǵan. Qazir bul is boıynsha qylmystyq kodekstiń 371 babyna sáıkes (adam ómirine qaýip tóndirgen salaqtyq), tergeý amaldary júrip jatyr», dedi Dinıslam Bolathanuly.
Basqarma basshysynyń aıtýynsha, qazirgi ýaqytta atalǵan ortalyqtyń 1 medbıkesi, 2 tárbıeshiniń kómekshisi, kúzetshi jumysynan ketken. Ortalyq basshysy jumystan bosatý týraly ótinish bergen.
«Bul qyzmetkerler óz erikterimen jumystan bosatý týraly ótinish berdi. Ári qaraı jumys istegileri kelmeıdi», dedi Dinıslam Bolathanuly.
Ýlanǵan qyzdar Pavlodardaǵy oblystyq ómirlik qıyn jaǵdaıǵa tap bolǵan balalardy qoldaý ortalyǵyna ótken jyldyń qazan aıynda kelgen. Bir qyz ári qaraı Shyǵys Qazaqstan oblysyndaǵy «devıantty minez-qulyqty balalarǵa arnalǵan oblystyq arnaıy mektep-ınternatyna» jiberilýi kerek bolǵan.
Aıta keteıik, ótken jyly atalǵan ortalyqta bólmelerge beınebaqylaý kameralaryn ornatý boıynsha kópshilik arasynda daý týǵan edi.
«Meniń jatyn bólmelerde beınebaqylaý kameralary bolǵan kezde bul jaǵdaıdyń aldyn alý múmkin bolar ma edi degen jeke oıym bar. Alaıda, bul másele ótken jyly rezonans týdyryp, sheshim boıynsha kameralardy alyp tastaǵanbyz. Biraq zań talabyna saı ortalyqtyń aýmaǵy, dálizder kórinip turatyndaı kameralar bar», dedi Dinıslam Bolathanuly. Sondaı-aq basqarma basshysy qyzdardyń antıseptık iship ýlanǵanyna qatysty pikir bildirdi.
«Balalar antıseptık ishedi degen eshkimniń oıyna úsh uıyqtasa da kelmeıdi. Alaıda, antıseptık barlyq jerlerde qoljetimdi orynda turý kerek. Ol soǵan arnalǵan. Kirgen kezinde antseptıkti qoldanyp, qaýipsizdigin qamtamasyz etýi tıis. Bul sabaq boldy», dedi Dinıslam Bolathanuly.
Pavlodar oblysynda ómirlik qıyn jaǵdaıǵa tap bolǵan balalardy qoldaýǵa arnalǵan 2 ortalyq bar. Ortalyqtarda 73 bala turady. Pavlodardaǵy ortalyqta – 29, Ekibastuzdaǵy ortalyqta – 44 bala bar. Ortalyqqa 3-18 jas aralyǵyndaǵy balalar keledi. Orta eseppen ár bala ortalyqta 3-6 aı aralyǵynda bolady. Oǵan qosa, ortalyqta turaqty bolatyn top bar. Ol topta 10 bala bar.
Eske salaıyq, 2 qańtar kúni saǵat 18:30-da oblystyq balalar aýrýhanasyna jedel járdemmen 2003 jyly týǵan qyz bala jetkizilgen. Ol oblystyq ómirlik qıyn jaǵdaıǵa tap bolǵan balalardy qoldaý ortalyǵynan es-tússiz kúıde jetkizildi. Qyz bala belgisiz zattyń ýly áseri dıagnozymen tústi.
Bas mıynyń isinýimen jansaqtaý bólimine jatqyzyldy. Intensıvti terapııa bastaldy. Jasalǵan emdeý sharalaryna qaramastan saǵat 20:00-de júregi toqtady.
