Avtokólik ıeleri salyq beresheginiń bolmaýy (bolýy) týraly aqparatty Qarjy mınıstrligi Memlekettik kirister komıtetiniń kgd.gov.kz portalanyń «Elektrondyq qyzmetter» bóliminen nemese E-SalyqAzamat mobıldi qosymshasynan (AppStore jáne PlayMarket) kórýge bolady. Iаkı Memlekettik kirister komıtetinde 1414 nómirine qońyraý shalyp, qosymsha nómiri «4»-ti basyp, Baılanys ortalyǵyna habarlasýǵa múmkindik bar.
Osy jyldan bastap engizilgen ózgeristerge sáıkes jeke tulǵalardyń 2020 jylǵa arnalǵan kólik salyǵyn 2021 jyldyń 1 sáýirinen keshiktirmeı tóleýi kerek. Biraq kólik salyǵyn tóleý esepti jyldan keıingi jyldyń 1 sáýirine aýystyrylýyna baılanysty azamattar arasynda salyq kólemi ósedi degen túsinispeýshilik týǵan. Bul jaǵdaıda kólik salyǵynyń somasyn esepteý kezinde 2020 jylǵy 1 qańtardaǵy aılyq eseptik kórsetkishtiń mólsheri eskeriledi. Oǵan qosa, ósimpuldardy esepteý algorıtmi de qaıta qaralyp jatyr. Eske sala keteıik, atalǵan merzimde AEK 2 651 teńgeni quraıdy. Iаǵnı salyq osy kórsetkishpen esepteledi. 2021 jylǵa arnalǵan kólik salyǵyn belgilengen ýaqytta tólegen kezde 2021 jyldyń 1 qańtaryndaǵy AEK qoldanylady. Demek, 2020 jyl úshin kólik salyǵy óspeıdi.
Endi avtokólik ıeleri úıden shyqpaı-aq salyqty ońtaıly júıemen tóleı alady. Ol úshin Komıtettiń www.kgd.gov.kz portalyndaǵy kalkýlıatordy ashyp, onda salyq kezeńin, kólik quralynyń túrin jáne qozǵaltqysh kólemin kórsetse boldy. Elektrondy servıs tıisti salyqty ózi eseptep beredi. Kalkýlıator portaldyń negizgi ekranyndaǵy «Elektrondy servıster» bóliminde ornalasqandyqtan, ol jyldam tabylady.
О́z sheshimin kútip turǵan máseleler jeterlik. Máselen, keı azamattardyń kóligi bolmasa da, olarǵa salyq mólshermesi jiberilgen. Eger avtokólik bolmaǵan jaǵdaıda, turǵylyqty jeri boıynsha Memlekettik kirister departamentine menshik quqyǵynda kólik quralynyń joqtyǵy týraly ýákiletti memlekettik organnan anyqtama usyný qajet. Sebebi kólikke salynatyn salyq ýákiletti memlekettik organnyń aqparaty negizinde esepteledi. Sonymen qatar kólik salyǵyn BSK kody – 104402 jáne STK kody – 911 nemese 912 kody arqyly tólenedi.
Budan ózge, salyq mólsherlemesi AEK mólsherine jáne kólik quralynyń qozǵaltqyshynyń syıymdylyǵyna baılanysty, sáıkesinshe jyl saıyn AEK ósýimen birge salyq somasy ósedi.
Múgedektiń jeke menshiginde qozǵaltqysh syıymdylyǵy 4000 tekshe sm-ge deıingi avtokóligi bolsa da, kólik salyǵynan bosatylmaıdy. О́ıtkeni, kólik quraldaryna salyqtan bosatý tek bir ǵana kólik quraly úshin qarastyrylǵan. Eger qozǵaltqyshynyń syıymdylyǵy 4000 tekshe santımetrden joǵary jeńil avtokólik 2013 jyldyń 31 jeltoqsanyna deıin ýákiletti memlekettik organda tirkelse jáne sol tirkelgen ýaqyttan bastap kólik quralynyń ıesi ózgermese, onda kólik quralynyń ıesi salyq tóleýden bosatylady.
Endigi jaıt urlanǵan kólik úshin salyq tóleý kerek pe? Munda esh shyǵyndalýdyń qajeti joq. Nege deseńiz, kólik quralyn urlaý boıynsha qylmystyq is qozǵaý faktisin rastaıtyn aqparat − urlanǵan kólikke salynǵan salyqtan bosatýǵa negiz bolyp tabylady. Sondaı-aq kólik quralyn urlaý týraly qylmystyq is qozǵalǵan kúnnen bastap salyqty esepteý toqtatylady, jáne qylmystyq is toqtatylǵan nemese keri qaıtarylǵan kúnnen bastap salyq qaıta esepteledi. Osylaısha, eger ýákiletti memlekettik organda kólik quralyn urlaý týraly qylmystyq is qozǵalmasa, salyq organynyń kólik salyǵyn esepteýdi toqtatýǵa esh negizi joq.
