«Belsendi azamattyq qoǵamsyz jemqorlyqty azaıtý, tipti ony túbegeıli joıý týraly aıtýdyń esh máni joq. Sondyqtan biz qoǵamdyq seriktesterdi tańdaýda jáne onyń sanyna qatysty ózimizdi shektemeımiz. Búgingi tańda agenttik sybaılas jemqorlyqqa qarsy 80 myńǵa jýyq belsendi men eriktilerdiń qoldaýyna ıe. Olardyń qaıtarymsyz qyzmeti azamattardyń naqty máselelerin sheshýge kómektesti. Biz munymen toqtap qalmaımyz, jumysty jalǵastyryp, aldyn alý qyzmetin kúsheıtemiz», dedi Alık Shpekbaev.
Is-sharaǵa Almaty qalasy ákiminiń orynbasary Erjan Babaqumarov, memlekettik organdardyń basshylary, úkimettik emes uıymdardyń, buqaralyq aqparat quraldarynyń ókilderi, qoǵam qaıratkerleri, joǵary oqý oryndarynyń rektorlary, «Almaty – adaldyq alańy», «Sanaly urpaq» jobalyq keńseleriniń, arnaıy monıtorıng tobynyń jáne olardyń fılıaldarynyń jetekshileri qatysty. Shaqyrylǵandar qatarynda Qazaqstan Respýblıkasy Tuńǵysh Prezıdenti – Elbasy Qorynyń atqarýshy dırektorynyń orynbasary, agenttik janyndaǵy sybaılas jemqorlyqqa qarsy is-qımyl jónindegi Qoǵamdyq keńestiń tóraǵasy Igor Rogov boldy.
Otyrysta Almaty qalasy ákiminiń orynbasary, «Almaty – adaldyq alańy» jobasynyń kýratory Erjan Babaqumarov jobany iske asyrýdyń oń nátıjelerin atap ótti: «Júrgizilgen jumystar aıasynda sybaılas jemqorlyq quqyq buzýshylyqtar deńgeıiniń tómendeýi men halyqtyń jemqorlyqqa qarsy belsendiliginiń artýynda oń ózgeris baıqalady». Túrli formattaǵy is-sharalar arqyly júzdegen almatylyq eldegi sybaılas jemqorlyqqa qarsy saıasat týraly aqparat aldy, quqyqtyq bilimderin nyǵaıtty. Bul jumys qalanyń barlyq aýdanynda «Adaldyq alańy» fılıaldary ashylǵannan keıin qosymsha qarqynǵa ıe boldy.
Kezdesý barysynda «Adaldyq alańy» jobalyq keńsesiniń jańa jetekshisi, Prezıdent janyndaǵy Ulttyq qoǵamdyq senim keńesiniń múshesi Aınur Sábıtova tanystyryldy.
Is-sharaǵa qatysqan qoǵam belsendileri sybaılas jemqorlyqqa qarsy jumysqa, onyń ishinde qoǵamdy saıası jańǵyrtý jáne demokratııalandyrý turǵysynan óz kózqarastaryn bildirip, naqty jemqorlyq táýekelderin belgiledi. Agenttik tóraǵasy barlyq másele boıynsha tolyq túsinikteme berip, birqatar naqty ótinish pen shaǵymdy baqylaýǵa aldy. Sondaı-aq memlekettik organdardyń basshylaryn jemqorlyqqa qarsy is-qımyl salasyndaǵy jumysty kúsheıtýge, «Adaldyq alańy» jobasynyń jumysyn jandandyrýǵa shaqyrdy. «Birde-bir másele nazardan tys qalmaıdy. Biz úshin belsendi qaıratkerlermen ótken ár kezdesý mańyzdy. Biz muqııat pysyqtap, naqty basqarýshylyq sheshimder qabyldaımyz, munyń bári zańnamadaǵy ózgeristerde kórinis tabady», dep sózin túıindedi A.Shpekbaev.
