Jedel-izdestirý is-sharalary barysynda Eskeldi aýdanynyń polıseıleri Almaty oblysy PD Krımınaldyq polısııa basqarmasynyń qyzmetkerlerimen birlesip, arnaıy bólimsheniń kómegimen oblys aýmaǵynda jasalǵan birqatar urlyqtarǵa qatysy bar degen kúdikpen Qarabulaq kentiniń 36 jastaǵy turǵynyn ustady.
«Ustalǵan adamdy krımınaldyq bazalar boıynsha teksergen polıseıler onyń Almaty oblysynyń aýmaǵynda jasalǵan 26 urlyqqa qatysy bar ekenin anyqtady. Ol jymysqy áreketterin Qarabulaq, Shymyr, Baqtybaı, Balpyq bı, Taldyqorǵan jáne t.b. eldi mekenderde iske asyrǵan. Ol qylmystarynyń barlyǵyn tapatal túste jasaǵan, jeke úılerge plastıkalyq terezelerdi syǵymdap ashý arqyly kirgen. Dáleldengen epızodtar boıynsha jábirlenýshilerge keltirilgen jalpy materıaldyq shyǵyn 15 mıllıon teńgeden asady. Ustalǵan kúdiktiniń osyǵan uqsas basqa da ashylmaǵan qylmystarǵa qatysy bar-joǵy tekserilýde», dep habarlady Eskeldi aýdany polısııa bóliminiń bastyǵy Qaırat Baımuhanov.
Kúdikti negizinen altyn buıymdar men uıaly telefondardy alyp ketýmen aınalysqan.
«Aıǵaq zattary az qylmystardy ashý barysynda qylmyskerlerdiń qol izderi arqyly ǵana kinálini anyqtaý sarapshy-krımınalısterdiń asqan sheberligin talap etedi. Krımınalıst mamandardyń oqıǵa ornynan muqııat jınaǵan dálelderiniń arqasynda onyń birqatar qylmystarǵa qatystylyǵy áshkerelendi. Kúdikti ýaqytsha ustaý ızolıatoryna qamaýǵa alyndy. О́zge aqparat tergeý qupııalyǵyna baılanysty jarııalanbaıdy», dedi Qaırat Baımuhanov.
