Qazaqstan • 10 Aqpan, 2021

Kvazımemlekettik sektor salasyndaǵy satyp alýlardy retteıtin zań jobasy tanystyryldy

7 ret kórsetildi

Qazaqstanda kvazımemlekettik sektordyń barlyq satyp alýlaryna qoldanylatyn biryńǵaı zań ázirlenetin bolady. Mundaı norma búgin Májiliste tanystyrylǵan «Kvazımemlekettik sektordyń jekelegen sýbektileriniń satyp alýy týraly» jańa zań jobasyna engizilmek.

Májilistiń Ekonomıkalyq reforma jáne óńirlik damý komıtetinde depýtat Albert Raýdyń jetekshiligimen atalǵan zań jobasynyń (ilespe túzetýlerimen) tanystyrylymy ótti.

Depýtattarmen qatar beınekonferensııa baılanysy arqyly ótken otyrysqa memlekettik organdardyń, qoǵamdyq uıymdardyń, kvazımemlekettik sektor sýbektileriniń, parlamenttik emes saıası partııalardyń, «Atameken» UKP ókilderi jáne sarapshylar qatysty.

Zań jobalary boıynsha baıandama jasaǵan Qarjy vıse-mınıstri Qanat Baedilov qazirgi ýaqytta kvazımemlekettik sektordy satyp alý túrli normatıvtik quqyqtyq aktilermen retteletinin túsindirdi. Mysaly, «Samuryq-Qazyna» qorynyń satyp alýlary – «Ulttyq ál-aýqat qory týraly» zańmen jáne Qordyń Dırektorlar keńesi bekitetin satyp alý erejelerimen júzege asyrylady. «Samuryq-Qazyna» qorynyń quramyna kirmeıtin «Báıterek», «QazAgro», «Zerde» sııaqty ulttyq kompanııalardyń jáne basqa da satyp alýlar – «Memlekettik múlik týraly» zańmen jáne Qarjy mınıstrliginiń satyp alý erejelerimen júzege asyrylady.

Vıse-mınıstrdiń aıtýynsha, endi joǵaryda atalǵan barlyq kvazımemlekettik sektor sýbektileriniń satyp alýlary biryńǵaı normatıvtik quqyqtyq aktimen retteletin bolady.

Memlekettik satyp alýlarǵa uqsas tenderlik qujattamany, aldyn ala ruqsat berý hattamasyn aldyn ala talqylaý tetikteri, tenderge qatysýshylardyń tenderlik qujattama bekitilgenge deıin óz eskertýlerin berý múmkindigi, sondaı-aq shaǵymdaný kezeńinde shart jasasýdy toqtata turý kózdeledi.

Satyp alý erejeleri deńgeıinde satyp alý prosesin egjeı-tegjeıli retteıtin normalardy retteý usynylady. Bul rette Samuryq-Qazyna qorynyń satyp alý qaǵıdalaryn bekitýdi Qordyń qaramaǵynda saqtaý usynylady. Ázirleýshi túsindirgendeı, bul Qor qyzmetiniń ereksheligine jáne onyń mártebesine, sondaı-aq IPO júrgizý jáne jekeshelendirýdiń ózge de nysandary kezinde Qor kompanııalarynyń ınvestısııalyq tartymdylyǵyn saqtaý qajettigine baılanysty.

Tutastaı alǵanda, zań jobasy bazalyq erejelerdi ǵana kózdeıtin 17 baptan turady. Negizgisin iske asyrý úshin ilespe zań jobasy ázirlendi, oǵan Kásipkerlik Kodekske jáne Aksıonerlik qoǵamdar týraly, Memlekettik múlik týraly jáne Ulttyq ál-aýqat qory týraly zańdarǵa túzetýler engiziledi.

Tutastaı alǵanda, zań jobalaryn qabyldaý kvazımemlekettik sektor sýbektileriniń satyp alýlarynyń ashyqtyǵyn arttyrýǵa jáne osy saladaǵy sybaılas jemqorlyq táýekelderin tómendetýge múmkindik beredi, dep túsindirdi baıandamashy.

Komıtet tóraǵasy Albert Raý otyrysty qorytyndylaı kele, depýtattar men basqa da qatysýshylar aıtqan eskertýler men usynystardy eskere otyryp, zań jobasy Májilis depýtaty Abılfas Hamedov bastaǵan jumys tobynyń otyrystarynda qaralatynyn jetkizdi.

Sońǵy jańalyqtar

Bir kúnde 3907 adam koronavırýstan aıyqty

Koronavırýs • Búgin, 09:45

15169 adam koronavırýs juqtyrdy

Koronavırýs • Búgin, 09:17

Uqsas jańalyqtar