Qazir óńir «jasyl aımaqta» tur. Epıdahýal kúrdelengen jaǵdaıda stasıonarlar men jedel jumylatyn medısınalyq-sanıtarlyq mekemeler saı tur. Fıltr kabınetteri, telefonmen keńes berý de qarastyrylǵan. Sondaı-aq úı jaǵdaıynda qyzmet kórsetý úshin qosymsha avtokólikter sany naqtylandy.
Epıdmaýsym bastalǵaly beri 205 142 synama alynypty. Keshe zerthanaǵa 1 309 synama tapsyryldy, mamandar onyń 596-syn tekserip úlgerdi. Adamnyń boıynda dert belgisi bar-joǵyn anyqtaıtyn testter oblystyq ftızıopýlmonologııa ortalyǵy, Ulttyq saraptama ortalyǵy, «INVIVO» men «OLIMP» klınıkalary, Aral obaǵa qarsy laboratorııasy arqyly tekseriledi.
Osy jylǵy 1 aqpannan Qyzylordada da COVID-19 ınfeksııasyna qarsy egý jumystary bastalǵany belgili. Sol kúni reseılik Spýtnık V vaksınasynyń 1 myń dozasy jetkizilip, medısına salasynyń qyzmetkerleri, onyń ishinde qabyldaý, juqpaly aýrýlar, jansaqtaý jáne hırýrgııalyq bólim mamandaryna egile bastady. Ekpe qaladaǵy №1, №3, №6 emhanalarynda júrgizilýde.
Aldaǵy ýaqytta muǵalimderge jáne juqtyrý qaýpi joǵary sanalatyn sala ókilderine de salynady. Ázirshe vaksınalaý oblys ortalyǵynda ǵana júrgizilýde. Jalpy, bastapqy jospar boıynsha oblysqa 80 myń doza vaksına kezeń-kezeńimen ákelinedi.
Alǵashqy on kúnniń qorytyndysy boıynsha 640 turǵynǵa ekpe jasalǵany belgili bolyp otyr. Olardyń 617-si – densaýlyq saqtaý salasynyń mamandary. Ekpe alǵandardyń barlyǵy dárigerler baqylaýynda, densaýlyq jaǵdaılaryna shaǵymdary joq.
– Oblys boıynsha medısına uıymdarynda 154 ekpe kabıneti bar. Sonyń ishinde koronavırýs ınfeksııasyna qarsy vaksınalaýǵa 32 ekpe kabıneti men 12 jyljymaly egý brıgadasy daıyndaldy. Osy kezge deıin vaksına saldyrǵandar arasynda shaǵym bolǵan joq. Densaýlyqtary turaqty baqylaýda, – deıdi oblystyq densaýlyq saqtaý basqarmasynyń basshysy Sábıt Pazylov.
Egý jumystary bastalǵaly beri densaýlyq saqtaý basqarmasy men sanıtarııalyq-epıdemıologııalyq baqylaý departamenti mamandary qaýyrt qımylǵa kóshken. Mamandar ekpe barysyn udaıy qadaǵalap, BAQ ókilderimen kezdesý ótkizýdi jıiletti. Al medısınalyq uıymdarda vaksınalaýdyń mańyzy týraly túsindirý jumystary keńinen júrgizilýde. Bul aldaǵy ýaqytta jalǵasyn tabady.
Qyzylorda oblysy
