Mınıstrdiń aqparaty boıynsha, aýyl sharýashylyǵynyń jalpy ónim kólemi qańtar aıynda 2,5%-ǵa artyp, 170 mlrd teńgeden asqan. О́sim mal sharýashylyǵyndaǵy óndiris kóleminiń 2,7%-ǵa, ıaǵnı, 158,4 mlrd teńgege deıin ulǵaıýy esebinen qamtamasyz etildi. Bıyl jyldyń alǵashqy aıynda soıylǵan mal eti óndirisi 5,3%-ǵa, sút óndirisi 3,8%-ǵa ósti. Qańtarda 10,2 mlrd teńgege ósimdik sharýashylyǵy ónimi óndirildi. Jalpy ósim kólemi jylyjaı sharýashylyqtaryna tıesili.
Azyq-túlik óndirisi qańtar aıynda 0,8%-ǵa, ıaǵnı, 142,1 mlrd teńgege deıin ósti. Atap aıtqanda, ósimdik maıynyń óndirisi 26,7%-ǵa (33 tonnadan 42 myń tonnaǵa deıin), qyzylsha qanty 25,1%-ǵa (4,6-tonnadan 5,8 myń tonnaǵa deıin), sary maı 16,3%-ǵa (1,4 myń tonnadan 1,6 myń tonnaǵa deıin), óńdelgen sút 3,2%-ǵa (48,2 myń tonnadan 49,7 myń tonnaǵa deıin), irimshik pen súzbe 0,8%-ǵa (2 358-tonnadan 2 377 tonnaǵa deıin) ulǵaıdy.
Sondaı-aq vedomstva basshysy Aýyl sharýashylyǵy mınıstrliginiń 2021 jylǵa arnalǵan jumys josparlary týraly da habarlady.
Bıyl jalpy aýyl sharýashylyǵy óniminiń ósimin 105%-ke, tamaq ónimderi óndirisiniń ósimin 107% deńgeıine jetkizý josparlanyp otyr.
Josparly ındıkatıvterge ishki naryqty áleýmettik mańyzy bar azyq-túliktermen tolyqtyrý jáne Qazaqstan agroónerkásip kesheniniń básekege qabilettiligin arttyrý jóninde sharalar qabyldaýdyń nátıjesinde qol jetkiziledi. Bul úshin AО́K sýbektilerin memlekettik qoldaý, onyń ishinde ınvestısııalyq sýbsıdııalaý, ósimdik sharýashylyǵy men mal sharýashylyǵyn sýbsıdııalaý jumystary jalǵasatyn bolady. Bul maqsatqa shamamen 309 mlrd teńge bólinedi.
Memleket basshysynyń tapsyrmasyna sáıkes, SQO-da dándi daqyldardy, Aqmola oblysynda maıly daqyldardy, Aqtóbe jáne Almaty oblystarynda et óndirý jáne qaıta óńdeý boıynsha ekojúıelerdi qurýǵa baǵyttalǵan ınvestısııalyq jobalar iske asyrylady.
Budan bólek, ımportty almastyrý maqsatynda bıyl 35 taýarly sút fermasyn (jalpy qýaty 131 myń tonna sút), 2 myń gektardan astam baqsha (óndiristik qýaty jylyna 73,5 myń tonna alma), 3 et kombınatyn (qýaty 45 myń tonna et ónimderi), 5 qus fabrıkasyn (qýaty 42 myń tonna), balyq óndiretin 4 nysandy (jalpy qýaty 8 myń tonnaǵa jýyq balyq) iske qosý josparlanǵan. Sonymen birge, óndiristik qýaty 150 myń tonna bolatyn qant zaýytynyń qurylysy bastalady. Jalpy, 2021-jyly túrli baǵyttaǵy 79 ınvestısııalyq jobany iske asyrý josparlanyp otyr.
Sonymen qatar, Aýyl sharýashylyǵy mınıstrligi kóktemgi egis naýqanyna daıyndyq jumystaryn bastap ketti. Jospar boıynsha bıyl jalpy egis alqaby qosymsha 86,4 myń gektarǵa ulǵaıyp, 22,7 mln gektarǵa deıin jetetin bolady. Maıly, azyqtyq, kókónis-baqsha daqyldarynyń, sondaı-aq qaraqumyq pen qant qyzylshasy sııaqty áleýmettik daqyldardyń alqaptaryn ulǵaıtý josparlanǵan. Al, bıdaı, kúrish jáne maqta sııaqty monodaqyldar men ylǵaldy kóp qajet etetin daqyldar egiletin alqaptar qysqartylady.
«Kóktemgi egis jumystaryn ýaqtyly júrgizý úshin fermerler 70 mlrd teńgeniń jeńildetilgen nesıesimen, sondaı-aq 380 myń tonnaǵa jýyq kólemde 11%-ǵa arzandatylǵan janar-jaǵar maımen qamtamasyz etiledi. Sonymen qatar, fermerlerge kómek retinde 350 myń tonnaǵa jýyq aýyl sharýashylyq ónimderin forvardtyq satyp alý josparlanýda. Tuqym sharýashylyǵyn sýbsıdııalaýǵa 11,8 mlrd teńge bólinedi. Bul sapaly tuqymǵa qol jetkizý múmkindigin arttyrady. Kóktemgi dala jumystaryn júrgizý mınıstrliktiń erekshe baqylaýynda bolady», dedi mınıstr.
