Almaty qalasy qutqarý qyzmetiniń basshysy Dmıtrıı Chýhonsev habarlamalarǵa beı-jaı qaramaýǵa shaqyrdy. Bul kúnderi Tótenshe jaǵdaılar departamenti taýdaǵy is-áreketter jóninde SMS arqyly da, vızýaldy jadynama taratý arqyly da halyqty qulaqtandyrý jóninde úlken jumystar atqarýda.
Dmıtrıı Chýhonsev sonymen birge taýǵa shyǵatyndarǵa arnalǵan usynystarymen bólisip, «Siz qaıda baratynyńyz, qaı baǵytqa bet alǵynyńyzdy, qaı núkteni baǵyndyrýdy josparlaǵanyńyz týraly birneshe adamǵa habarlaý qajet. Iаǵnı, tanystaryńyz maksımaldy aqparat pen josparlanǵan qaıtý ýaqytyn bilýi tıis», dep túsindirdi.
Sonymen qatar, «adam ózin taýdaǵy aýa-raıynyń qandaı bolatyndyǵy týraly aqparatpen tolyq qamtamasyz etýi kerek. Múmkindiginshe alǵan baǵytyńyzdy erterek bastańyz jáne óz kúshińizdi kúndizgi ýaqytqa esepteńiz, sonymen qatar tıisti jabdyqty daıyndańyz: kıim, rıýkzak, aıaq kıim, sham jáne basqa jabdyqtar».
Qutqarý qyzmetiniń basshysy sondaı-aq bylaı dep qosty: «О́zińmen birge únemi suıyqtyq jáne az mólsherde qorek bolý kerek. Bul azyq-túliktiń kóp mólsheri bolmaýy kerek, biraq jańǵaqtar men shokolad sııaqty joǵary kalorııaly taǵamdar bolýy kerek».
Sonymen qatar, jańadan bastaýshylarǵa bólek usynystar berildi.
«Taýda bolý tájirıbesin eskerý qajet. Eger sizdiń tájirıbeńiz bolmasa, onda maqsatyńyz bizdiń Almaty óńirindegi shyńdardy baǵyndyrý (qıyndyǵy jóninen) bolmaýy kerek. Sondaı-aq, alǵan baǵytpen júrý úshin aldymen ony tolyǵymen zertteý kerek. Eger siz birinshi ret shyqqan bolsańyz, onda sizdi qandaı da bir taýǵa deıin kásibı túrde jeteleıtin tájirıbeli nusqaýshymen (ınstrýktormen) jasaǵan durys», dep atap ótti spıker.
Onyń aıtýynsha, «barlyq jaýapsyz áreketter qaıǵyly saldarǵa ákelýi múmkin ekenin túsiný kerek». Osyǵan baılanysty Dmıtrıı Chýhonsev barlyǵyn qaýipsizdik sharalaryn saqtaýǵa jáne tótenshe jaǵdaılar departamentiniń habarlamalaryna beı-jaı qaramaýǵa shaqyrdy.
