«Zerek» oıynynda oıynshylar qazaq halqynyń maqal-mátelderin, ertegi men jańyltpash, yrym-tyıymdar men turaqty tirkesterdi jetik bilýimen synalady.
Oıynnyń qozǵalys tártibi, ýaqyty, erejeleri, oıynshylar sany jáne túrli bonýstar júıesi oılastyrylǵan. Munda barlyǵy 57 uıashyq, olardyń arasynda tuzaq (ot jáne sý), bonýs jáne aqyly uıashyqtar bar. Oıyn bastalysymen birinshi oıynshy súıekti laqtyryp, óz qadamyn jasaıdy. Ol 100 suraq kartasynyń birin tańdap, oǵan jaýap berýi qajet. Tuzaq uıashyqtaryna túsip qalsa, ot uıashyǵynan Kóltaýysar, al sý uıashyǵynan Jelaıaq qutqara alady. Eger oǵan qajet keıipker túspese, oıynshy sol uıashyqta qala beredi. Kerisinshe, ózge oıynshynyń kezegi kelgende 2500 (bonýs túrindegi qaǵaz banknottar) aıyppul tólep, óz jolyn jalǵastyra alady. Márege kim birinshi jetse, sol jeńimpaz atanady.
«Zerek» mazmunyna «sýrettegi maqal-máteldi jalǵastyrý/tabý», «frazeologızm, yrym-tyıym maǵynasyn ashý, «jańyltpashty qaıtalaý», ertegiler men ańyzdar boıynsha erýdısııany tekserý, jumbaqtardy sheshý sııaqty suraqtar kiredi. Avtordyń aıtýynsha, naryqta «Qoltyraýyn», «Monopolııa» sııaqty orys tilindegi ústel oıyndary kóp, biraq, ókinishke oraı, ana tilinde ulttyq mazmundaǵy oıyndar joqtyń qasy.
– Sońǵy ýaqytta «Qazaq handyǵy» atty ústel oıyny paıda boldy. Bul oıyn tarıhymyzdy, qazaq elindegi basqarý júıesin oıyn arqyly tanystyrýdy kózdegen. Kitap, fılm sekildi ulttyq ıdeologııany nasıhattaý quraly retinde ústel oıynyna da oryn bar dep oılaımyn, – deıdi avtor.
Aınamkóz oıyndy áýeli synyptastary arasynda synap kórgen. Al jýyrda jobanyń qaǵaz nusqasyn Oral qalasyndaǵy balalar aýyly tárbıelenýshilerine syıǵa tartyp, oıyn tártibin úıretken. Sonymen qatar «Zerektiń» elektrondy nusqasy da daıyndalǵan (https://my.flipbookpdf.net/7k2rP) .
– Ústel oıynynyń adamǵa tıgizetin áseri kóp, onyń ústine oıynnyń ulttyq mazmuny jahandaný kezeńinde óte mańyzdy dep oılaımyn. Oıyn sharttary týraly qosymsha qural daıyndaý josparda bar. Bolashaqta «Kókpar», «Qyz qýý» ulttyq oıyndarynyń sharttaryna negizdelgen ulttyq mazmundaǵy ústel oıynyn qurastyrmaqpyn, – deıdi avtor.
Aınamkóz joba barysynda baǵyt-baǵdar bergen jetekshileri – qazaq tili men ádebıeti pániniń muǵalimi Jansáýle Maqsotova pen óner pániniń muǵalimi Janna Qulbekovaǵa alǵys aıtady.
