Máselen, Almaty oblysynda koronavırýs indetine shaldyqqandardyń jalpy sany 9 781 adamǵa jetti. Onyń ishinde 3 976 naýqastyń qaýipti vırýsty tasymaldaýshy ekeni anyqtaldy. Qýanyshtysy, der kezinde jasalǵan sharalar indettiń jappaı taralýyna tosqaýyl bolyp, naýqastardyń saýyǵyp shyǵýyna járdemin tıgizdi. Osy jerde jetisýlyq dárigerler men sanıtarlyq qadaǵalaý qyzmeti mamandarynyń eńbegine erekshe rızashylyq bildirgen oryndy.
Qazir óńirdegi epıdemııalyq jaǵdaı turaqty. Oblys «jasyl aımaqta». Sońǵy eki apta aralyǵyndaǵy indettiń anyqtalý deńgeıi 0,8 paıyzdan tómendep, 0,6 paıyzdy qurady. Jaǵdaıdyń turaqtanýy shekteý sharalaryn jeńildetýge múmkindik berip otyr.
– Meshitterdiń 30 paıyzǵa deıin jamaǵat jınaýyna ruqsat etildi. Iаǵnı qulshylyq oryndarynda 100 adamnan aspaıtyn toppen namaz oqýǵa bolady. Onyń ishinde aýyldyq jerlerde juma namazy oqylady, biraq adam sany 150 kelýshiden aspaýy tıis degen talap bar. Al karantın talaptaryna sáıkes oryn sany 50-den aspaıtyn qoǵamdyq tamaqtaný nysandary jumys istep jatyr. Sonymen qatar aıaldamalar men qoǵamdyq kólikterde azamattardyń jappaı jınalýyn boldyrmaý maqsatynda adam sany 250 jumysshydan asatyn jumys oryndaryna qyzmetkerlerdi tasymaldaý úshin mekemeniń qyzmettik kóligin paıdalaný usynylady. Shtat kestesinde 30-dan asatyn qyzmetker bolsa, olardyń 50 paıyzy qashyqtan jumys isteýi tıis. Biz osyndaı shara arqyly indettiń taralýyn toqtata alamyz, – deıdi oblystyq sanıtarlyq-epıdemıologııalyq baqylaý departamenti basshysynyń orynbasary Ashat Sharapıev.
Koronavırýspen kúreske jappaı jumylǵan oblys dárigerleri týraly aıtqanda aýyldaǵy aq jeleńdi abzal jandardyń eńbegine erekshe toqtalýymyz kerek sııaqty. О́ıtkeni pandemııa kezinde shalǵaıdaǵy emhanalardyń múmkindigi men mamandardyń biliktiligi birinshi synǵa túskeni belgili. Bul emhanalardaǵy jaǵdaı ortalyqtaǵydaı joǵary deńgeıde bolmasa da, naýqasqa kómek berý turǵysynan alǵanda erlikke bergisiz eńbek jasalǵany anyq. Sondaı ujymnyń biri – Talǵar aýdany Panfılov aýylyndaǵy aýrýhananyń dárigerleri. Indettiń birinshi tolqynynda provızorlyq ortalyq qyzmetin atqarǵan medısnalyq mekeme qazir ınfeksııalyq bólimshe retinde jumysyn jalǵastyrýda. Munda 60 tósektik oryn bar. Osy sátte koronavırýs indetine shaldyqqan 49 naýqas em qabyldap jatyr.
– Bizdiń aýrýhana bir jyl buryn koronavırýs indetimen kúresý maqsatynda qaıta jasaqtalyp, jedel qyzmet kórsetýge kiristi. Demek, aýyldaǵy aýrýhana retinde toqtaýsyz jumys istep, jylǵa jýyq ýaqyt boıy qaýipti vırýspen kúresip kelemiz. Byltyr naýryz aıynan bastap qyrkúıektiń ortasyna deıin provızorlyq bólimshe boldyq. Odan beri ınfeksııalyq bólimshe retinde naýqastardy emdeýdemiz. Búginde bólimshedegi 49 naýqasqa vırýsty ókpe qabyný degen dıagnoz qoıylyp, em-shara jasalýda. Olardyń arasynda 7 naýqastyń PTR taldaýynyń qorytyndysy oń nátıje kórsetti, olar oqshaýlanǵan. Al jaǵdaıy aýyr 5 naýqasty aýdandyq aýrýhananyń jansaqtaý bólimine jónelttik, – deıdi Panfılov aýyldyq aýrýhanasy bas dárigeriniń orynbasary Zýhra Tilepbergenova.
Bul bólimshede alǵashqy kómek kórsetýge qajetti medısınalyq qural-jabdyqtyń barlyǵy bar. Munda ókpeni jasandy jeldetetin 3 apparat pen 8 ottegi kondensaty iske qosylǵan. Dári-dármek qory da jetkilikti. Bólimshedegi 8 bilikti dáriger men 12 meıirbıke adam janyna arasha túsýge árqashan daıyn. Jalpy, osy shaǵyn bólimshede ótken merzimde 619 naýqas emdelip, indetten qulan taza aıyǵyp shyqqan eken.
Almaty oblysy
