Dástúrli týrnırdiń maqsaty – ádettegideı: halyqty salamatty ómir saltyn ustanýǵa shaqyrý. Sonymen qatar úzdik komandalardy, úzdik oıynshylardy anyqtap, budan da úlken jarystarǵa daıyndaý. «Úshqońyr» týrnıriniń bir ereksheligi – áýesqoı oıynshylar ǵana qatysty.
Elbasynyń týǵan jeri Shamalǵandaǵy «Úshqońyr» sport kesheninde ótken dúbirli dodada Qazaqstannyń óńirlerinen kelgen 12 komanda baq synasty. Qarsylas komandalar tórt topqa bólinip, tórteýinen de sýyrylyp Shyǵystyń oıynshylary shyqty. Jarys nátıjesinde IV oryn Tarbaǵataıdyń jigitterinen quralǵan «Jiger» komandasyna buıyrdy. III oryndy Kúrshim aýdanynan kelgen «Baraq batyr» komandasy qanjyǵaǵa basty. II oryndy shyǵysqazaqstandyq «Shekara Shyǵys» komandasy aldy. Al I oryndy Kúrshim, Katonqaraǵaı, Tarbaǵataı, Zaısan aýdanynyń sportshylarynan quralǵan «Yntymaq» komandasy enshiledi.
Oıynda Ádilet Qadyrhanov, Aıdar Ashatov, Shalqar Kalymov, Birjan Ospanov syndy voleıbolshylar sheberlikterimen erekshelendi. Oıynshylardyń daıyndyqtaryna jattyqtyrýshylardyń da ter tókkeni belgili.
– Oıyn óte tartysty ótti. Qyzylorda, Taraz, Almaty oblystarynan Alakól, Raıymbek aýdandarynan kelgen komandalardyń da daıyndyǵy myqty boldy. Áý degende-aq shyǵystyqtar ár toptan birinshi bolyp shyǵyp, ózara saıysqa tústi. Dop dodasynyń ótýine uıytqy bolǵan «Al-Azım» qoǵamdyq ortalyǵyna, tóreshilerge raqmet. Osyndaı jarystarda oıynshylar shyńdala beredi, – deıdi jattyqtyrýshy Meıir Ramazanov.
Buǵan deıin de atalmysh týrnırde shyǵysqazaqstandyq «Muztaý» komandasy birinshi oryn, Kúrshim aýdanynyń «Baraq batyr» komandasy ekinshi oryn alǵan bolatyn.
