Bilim • 24 Aqpan, 2021

Elimizdegi joǵary oqý oryndarynan bir kúnde myńǵa jýyq stýdent shyǵarylǵan

117 ret kórsetildi

Joǵary oqý ornynyń 1 kúnde 800-1000 stýdentti birden oqýdan shyǵarǵany týraly mysaldar bar. Bul týraly Bilim jáne ǵylym vıse-mınıstri Mıras Dáýlenov óziniń Facebook paraqshasynda tarqatyp jazdy, dep habarlaıdy Egemen.kz

«Aldyńǵy jazbada biz nege joǵary oqý oryndaryn lısenzııadan aıyratynymyz týraly jazǵan bolatynmyn. Ol jazbany kóptegen adamdar qoldady, olarǵa raqmet aıtamyn. Qoǵam joǵary bilim berýdegi ózgeristerge, onyń ishinde sapasyz bilim beretin joǵary oqý oryndarynyń jabylýyna naqty ári negizdi saýal qalyptastyrǵanyn baıqaýǵa bolady. Aldyńǵy jazbada men tek joǵary oqý oryndary tarapynan jiberilgen eń óreskel buzýshylyqtardyń ǵana betin ashqan bolatynmyn. Búgin men keıbir joǵary oqý oryndarynyń tek bir maqsat − tekserýden ótý úshin qandaı amaldarǵa baratynyn kórsetkim keledi. Bul rette taǵy da atap ótemin, sóz tek búginde basym kópshiligi sapaly bilim berýge tyrysatyn oqý oryndarynyń shaǵyn toby týraly bolmaq», deıdi vıse-mınıstr.

Vedomstvo orynbasarynyń aıtýynsha, eń aldymen tekserý aldynda stýdentterdi, onyń ishinde sheteldik stýdentterdi jappaı oqýdan shyǵarý. Sonymen qatar tekserýden keıin barlyq stýdentter aman-esen oqýǵa qaıta qabyldanady, tek olar oqýdan shyǵarylǵanyn bilmeıdi.

«Joǵary oqý ornynyń 1 kúnde 800-1000 stýdentti birden oqýdan shyǵarǵany týraly mysaldar bar. Bul oqytýshylar sany az bolsa da, stýdentterdiń shaǵyn kontıngentin oqytýǵa jetkilikti ekenin nemese ádebıetter, jabdyqtar sanynyń azdyǵy sol stýdentter sany úshin jetetinin kórsetý úshin jasalady.

Keıbir joǵary oqý oryndarynda stýdentterdiń jappaı kóshi-qony sharyqtaý shegine jetken. Birinshi kýrsqa 200 stýdent qabyldanady, al 900-i bitiredi», deıdi mınıstrdiń orynbasary Mıras Dáýlenov.

Keıbir joǵary oqý oryndarynda bitirýshilerdiń ósimi 400, 500 jáne tipti 950%-dy quraıdy eken.

Osy oraıda Mıras Dáýlenov kóbinese beldi joǵary oqý oryndarynan nashar úlgerimi, akademııalyq adaldyq qaǵıdalaryn buzǵany úshin oqýdan shyǵarylǵan stýdentter ekenin basa aıtty.

Sońǵy jańalyqtar

Uqsas jańalyqtar