Aımaqtar • 24 Aqpan, 2021

Adam ómiri úshin arpalys

22 ret kórsetildi

Aqpannyń 22-ci kúni Atyraý-Oral tasjolynda bolǵan jantúrshigerlik jol apatynan 6 adam qaza bolǵan edi. Osy oqıǵa kezinde aýyr jaraqat alǵan bir adamnyń ómiri úshin dárigerler ajalmen arpalysyp jatyr, dep habarlaıdy Egemen.kz

Batys Qazaqstan oblysynyń Aqjaıyq aýdanyna qarasty Atameken aýyly mańynda «Toıota korolla» men «Lada prıora» kóligi betpe-bet soqtyǵysyp, 4 áıel, 2 er adam qaza tapqan edi. Apattan «Toıota» kóligindegi Atyraý oblysynyń turǵyny, 42 jasar er adam ǵana aman qalǵan. «Jedel járdem» qyzmetkerleri ony eń jaqyn jerge – Taıpaq aýylyndaǵy aýrýhanaǵa jetkizgen edi.

Aýyl aýrýhanasynyń dárigerleri jolaýshyǵa alǵashqy medısınalyq kómek kórsetip, aýyrsynýǵa qarsy sharalar qoldandy. Jaraqat onyń ishki qurylysynda eken. Sol kúni túngi saǵat 22-ge qaraı naýqastyń jaǵdaıy nasharlaı bastaıdy. Tez arada Chapaev aýylynan Aqjaıyq aýdandyq aýrýhanasynan hırýrgııalyq top shaqyryldy. Hırýrg Dáýren Kúdesov, aýrýhana dırektory, joǵary sanatty hırýrg Almas Júnisbekov Taıpaqqa jedel attandy.

Hırýrgter Taıpaq aýrýhanasyna jetisimen jedel otaǵa kirisken. Alaıda kúrdeli ota kezinde áriptesterdiń aqyl-keńesi ári kómegi qajet boldy. Oral qalasynan maman shaqyrtýǵa alaı-túleı soqqan boran mursha bermedi. Osy kezde kórshiles Jańaqala aýdandyq aýrýhanasynyń bas dárigeri, joǵary dárejeli hırýrg, ota jasaýda 14 jyldyq eńbek ótili bar Serjan Esengóbekov kómekke attandy. Alaıda 150 shaqyrymdaı jol júrip, Aqjaıyq aýdany ortalyǵyna jetkenimen, Taıpaqqa deıin áli de alys edi. Onyń ústine aýa raıynyń qolaısyzdyǵyna baılanysty avtojoldar jabylǵan. Bilikti hırýrgtiń adam ómirin qutqarý úshin alys jolǵa shyqqanyn estigen jol polısııasy qyzmetkerleri Serjan Serikulyn ózderiniń patrýldik kóligimen Taıpaqqa jetkizedi. Sóıtip, asa kúrdeli ota óz ýaqytynda jasalǵan.

– Hırýrgtar ota ústelinde 10 saǵat-tan artyq ýaqyt boıy ajalmen arpalysty. Qazir naýqastyń jaǵdaıy áli de aýyr, tasymaldaýǵa kelmeıdi. Degenmen eń basty qıyndyq artta qaldy, ota jasaldy. Dárigerler óz qolynan keletinniń bárin jasap jatyr. Naýqas jazylyp, qatarǵa qosylady degen úmitimiz bar, – deıdi Batys Qazaqstan oblystyq densaýlyq saqtaý basqarmasynyń baspasóz hatshysy Sáýle Zaǵıdýllına.

Árıne, bul jerde dárigerler ǵana emes, polısııa, tótenshe jaǵdaılar qyzmeti de barynsha jedel ári uıymdasa qyzmet kórsetýde. Adam ómiri úshin ýaqytpen de, tabıǵattyń tosyn minezimen de sanaspaı, kómek qolyn sozǵan barsha mamandarǵa myń san alǵys!

Sońǵy jańalyqtar

ShQO-da mal urylary ustaldy

Aımaqtar • Búgin, 11:00

Uqsas jańalyqtar