«Kelesi mańyzdy másele – múmkindigi shekteýli adamdarǵa barynsha qolaıly jaǵdaı jasaý. Eń aldymen, barlyq sanattaǵy múgedektikti anyqtaý rásimderin túbegeıli jeńildetý kerek. Qazir kútimge muqtaj adamdardyń ózine tıesili áleýmettik qyzmetterdi paıdalanýy óte qıyn», deıdi Prezıdent Q.Toqaev.
Prezıdenttiń aıtýynsha, olar onsyz da belgili nárseni dáleldeý úshin túrli keńseniń tabaldyryǵyn tozdyrýǵa májbúr. Sıfrlyq tehnologııalar men avtomattandyrý dáýirinde mundaıǵa jol berýge bolmaıdy. Sondyqtan, jumys tásilin dereý ózgertý qajet.
«Biryńǵaı aqparattyq qor (baza) quryp, jurtqa yńǵaıly ári jumys isteýge ońtaıly júıeni nege jasamasqa? Densaýlyq saqtaý mınıstrligi men Eńbek jáne halyqty áleýmettik qorǵaý mınıstrliginiń aqparattyq júıelerin biriktirý kerek. Bul jumysty jedeldetý qajet», dep tolyqtyrdy Memleket basshysy.
