Mekteptiń Qamqorshylyq keńesiniń músheleri - qala ákiminiń orynbasary Erjan Babaqumarov, Tuńǵysh Prezıdent-Elbasy Qory janyndaǵy “Ulttyq Ustaz Onlaın Akademııasy" SEO kóshbasshysy Gúlmıra Qorǵanbaeva, “Otbasy bank” turǵyn úı qurylys jınaq banki” AQ tóraǵasynyń orynbasary Nurlan Aqshanov, QR BǴM ǴK "Janý problemalary ınstıtýty" RMK bas dırektorynyń keńesshisi, professor Zýlhaır Mansurov 2021 jylǵy Keńes qyzmetiniń basym baǵyttaryn talqylady.
Almaty qalasynyń NZM HBB baspasóz-qyzmetiniń málimetine súıensek, mektep dırektory Gúlmıra Mýnkeeva fılıaldyń 2020 jylǵa arnalǵan oqý jetistikteri, tárbıe jumysy, mektep túlekteriniń joǵary oqý oryndaryna túsýi, oqýshylardyń bilim jetistikterin baǵalaý jónindegi halyqaralyq baǵdarlamanyń nátıjeleri sııaqty negizgi baǵyttar boıynsha jumys esebin berip, Almaty Zııatkerlik mektebiniń taıaýdaǵy strategııalyq josparlarymen tanystyrdy.
Jınalystyń basty taqyryby - jalpy alańy 800 sh.m.quraıtyn "NIS engineering LAB" ashyq sıfrlyq tehnologııa zerthanasynyń mektep aýmaǵyndaǵy bolashaq qurylysty talqylaý boldy. NIS –tiń jańa jobasy bolashaqta Zııatkerlik bilim ordanyń oqýshylarymen qatar qalanyń barlyq jalpy bilim beretin mektepteriniń shákirtteri úshin IT-startaptar men ǵylymı-zertteý qyzmetin damytýǵa arnalǵan Hub-alańyna aınalýy tıis.
Sonymen qatar, jıynda Zııatkerlik mektepterdiń tájirıbesin Almatynyń jalpy bilim berý mekemelerine keńinen engizý qajettigine erekshe nazar aýdaryldy. NIS tájirıbesin taratý aıasynda almatylyq Zııatkerlik bilimordasy qalanyń 80 mektebi jáne oblystyń 20 mektebin qamtýda, únemi ótkizilip otyratyn arnaıy vebınarlar, semınarlar, sheberlik synyptarǵa óńirdiń myńnan astam pedagogtary qatysady.
Mektep dırektory aýyl mektepterinen daryndy oqýshylardy NZM-ge oqýǵa túsý boıynsha konkýrstyq irikteýge qatysýǵa neǵurlym belsendi tartý týraly máseleni kóterdi. Qamqorshylyq keńesiniń músheleri respýblıkadaǵy orta bilim berýdiń flagmany bolyp tabylatyn bilim ordasyna túsý emtıhandaryna alys aýdandardaǵy oqýshylardy jan-jaqty daıyndaý úshin múmkindik beretin algorıtmderdi talqylady.
Mekteptiń Qamqorshylyq Keńesiniń kelesi otyrysy 2021 jyldyń sáýir aıyna josparlanǵan.
