Keńeste aıtylǵan málimetter boıynsha, 2020 jyly barlyq memlekettik baǵdarlamalar negizinde, sondaı-aq ShOB salasynda 76,3 myń jumys orny quryldy. Bıyl «Eńbek» baǵdarlamasy aıasynda «TjKB» baǵyty boıynsha joǵary oqý oryndaryna túspegen jastar men turmysy nashar otbasylardyń jasóspirimderi arasynan 15-24 jas aralyǵyndaǵy 2,5 myń adamdy oqytý josparlanýda. «Qysqa merzimdi oqytý» baǵyty boıynsha tigin jáne kondıterlik is, býhgalterııa sııaqty suranysqa ıe mamandar daıarlaıtyn kýrstarstarda 1 myń adam oqıtyn bolady. Osy baǵyt boıynsha oqıtyndarǵa stıpendııa beriledi, olardyń jumysqa turýlaryna kómek kórsetiledi.
«Eńbek» baǵdarlamasynyń taǵy bir baǵyty – shaǵyn nesıeleý jáne granttar. Jalpy somasy 1,6 mlrd teńgege 115 adam shaǵyn nesıe alady dep josparlanýda. 200 AEK kólemindegi granttar jalpy somasy 583,4 mln teńgege 1 myń adamdy qabyldaı alady. 1000-ǵa jýyq jumyssyzdar áleýmettik jumys oryndaryna, taǵy 6000-y qoǵamdyq jumystarǵa ornalasady. Jastar praktıkasymen 29 jasqa deıingi 800 adam qamtylatyn bolady.Megapolıs ákimi B. Saǵyntaevtyń tapsyrmasy boıynsha qosymsha bólingen qarjynyń arqasynda jastardyń aı saıynǵy jalaqysy 100 myń teńgege deıin ósti.
Megapolıstegi eńbek naryǵynyń jaǵdaıyna KVI-ge qatysty bolǵan tótenshe jaǵdaılar men karantın kezindegi shekteý sharalary aıtarlyqtaı áser etti. Birqatar saýda jáne qyzmet kórsetý kásiporyndary ózderiniń pandemııaǵa deıingi áleýetin qalpyna keltire almaýda. Sondyqtan Almaty qalasynyń ákimi B. Saǵyntaev óziniń orynbasarlaryna, aýdan ákimderine jáne múddeli basqarma basshylaryna qıyn jaǵdaıǵa tap bolǵan kásiporyndarǵa qajetti kómek kórsetý úshin barlyq sharalardy qabyldaýdy tapsyrdy.
«Jumys oryndaryn qurý úshin memlekettik baǵdarlamalardy iske asyrýǵa bólingen qarjyny barynsha tıimdi paıdalaný qajet », - dep atap ótti B. Saǵyntaev.
Ol óziniń sózinde jumys oryndaryn qurý men olardy saqtap qalý ákimdiktiń kún tártibindegi basty mindetterdiń biri ekenin atap ótti.
«Eńbek – durys ómir súrýdiń negizi, megapolıs turǵyndarynyń qanaǵattaný deńgeıi osyǵan baılanysty. Qalalyqtardy jumyspen qamtý eń basty másele bolýy tıis», - dedi Almaty ákimi B. Saǵyntaev.
Qalada jumyspen qamtýdy qoldaý sharalarynyń qatarynda óndiristik parkterde óndiris oryndaryn tegin usynýdyń pılottyq jobasy qarastyrylýda. Jeke kásippen aınalysqysy keletinder ShOB damytý baǵdarlamalary úshin jeńildetilgen nesıe alyp, óz bıznesin ashyp, ózin jáne jaqyndaryn jumyspen qamtamasyz ete alady.
JOO men kolledj túlekterin jumyspen qamtý deńgeıin arttyrý maqsatynda kásiptik baǵdar berýdi kúsheıtý úshin óndiris oryndarynyń bazalarynda oqý ortalyqtaryn iske qosý josparlanýda. Sonymen qatar, túlekterge monıtorıng júrgizilip, biryńǵaı bazasy jasalady, joǵary jáne orta arnaýly oqý oryndarynda kásipkerlik negizderi boıynsha oqytý jalǵasady, sonyń negizinde onda bıznes-ınkýbatorlar da ashylady.
Keńeste kásiporyndardyń jalaqy boıynsha qaryzdaryn azaıtý jáne mindetti zeınetaqy jáne áleýmettik saqtandyrý tólemderiniń keshiktirilýine jol bermeý sharalary da qaraldy.
