Aımaqtar • 01 Naýryz, 2021

Sozaqtyq polıseıler boranda jolda qalǵandardy qutqardy

19 ret kórsetildi

Túrkistan oblysy aýmaǵynda qalyń qar jaýyp, aq tútek boran bastaldy. Birneshe kún boran men qar jaýyp oblys joldarynyń barlyǵynda kólikterdiń júrýine kedergi keltirip, damylsyz soqqan aq tútek boran jolaýshylardy jolda qaldyrdy, dep habarlaıdy Egemen.kz

Aýyr júk kólikteri men jeńil kólikter jol jıegine shyǵyp ketip, tipti keıbiri bir-birine soqtyǵysyp jatty. Aýa raıynyń tosyn minez tanytyp, ysqyryp soqqan sýyq jelde azamattardyń amandyǵy men qaýipsizdigin qamtamasyz etý úshin Túrkistan oblysynyń búkil jeke quram qyzmetkerleri oblys joldaryna jumyldyryldy. Tań atpastan kúsheıtilgen rejımde jumysqa kirisken polıseıler barynsha turǵyndarǵa saq bolýlary men úıden shyqpaýlaryn eskertti.

Al jolda qalǵan jolaýshylardy qyzmettik kólikterimen jyly orynǵa jetkizip, qarǵa batyp, júre almaı qalǵan kólikterge qaryn kúrep, qaıtadan júrip ketýine yqpal jasady. Kúrek ustap qar kúregen, kólik ıterip, kómek kórsetken polıseıler sýyqqa qaramastan qyzmetterin táýliktep atqardy. Máselen, Sozaq APB-niń polısııa qyzmetkerleri aýa raıynyń kenetten buzylyp ketkenine baılanysty «Ulanbel-Sozaq-Ekpindi» tas joldary jabylǵan. Polıseıler qar qursaýynda qalyp qoıǵandarǵa kómek berdi. Nátıjesinde bir táýlik ishinde tórt avtobýs, tórt jeńil avtokólik jol shetine shyǵyp qalǵan. Sonyń ishinde tártip saqshylary 100-den astam jolaýshylardy qutqaryp úı-jaılaryna jetkizildi. О́z kezeginde júrgizýshiler men jolaýshylar sozaqtyq polısııa qyzmetkerlerine: «Raqmet, eńbekterińiz jana bersin! Túrkistan oblysy polısııa qyzmetkerlerine alǵys aıtamyz», dep jyly lebizderin jetkizdi. Al kúnniń yzǵaryna qaramastan qyzmetin jalǵastyryp jatqan polıseıler jolaýshylarǵa joldyń taıǵaq ekenin, abaı bolý kerektigin aıtty. Uzaq jolǵa shyqpaý kerektigin aıtyp, eskertý jasady.

Sozaq APB-nyń qyzmetkerleri aýa raıynyń tosyn minez tanytyp, burqasyn bolýyna, qardyń qalyń jaýýyna baılanysty joldyń jabyq ekenin eskertedi. Barsha turǵyndar men qonaqtarǵa jolǵa shyqpaýǵa keńes beredi. Tártip saqshylary jolaýshylardyń amandyǵy úshin, joldarda kirpik ilmesten qyzmet etýde. Tezirek joldyń ashylyp, qardan tazalanýyna kómektesýde.

Sońǵy jańalyqtar

Uqsas jańalyqtar