Foto: Ashyq derekkóz
Ulttyq ekonomıkalyq zertteýler bıýrosynyń boljamyna sáıkes, 2026 jyldyń mamyryna arnalǵan bazalyq ssenarııde dollardyń ortasha baǵamy shamamen 463,8 teńge deńgeıinde qalyptasýy múmkin. Al optımıstik ssenarıı boıynsha teńge 446,3 deńgeıine deıin nyǵaıýy yqtımal. Pessımıstik boljamda dollar baǵamy 481,3 teńgege deıin ósýi múmkin.
Sarapshylardyń aıtýynsha, qazirgi kezde teńge baǵamyna birden birneshe faktor qoldaý kórsetip otyr. Sonyń ishinde munaı baǵasynyń joǵary bolýy ekonomıkaǵa valıýtalyq túsim kólemin arttyryp, syrtqy saýda teńgerimin jaqsartqan.
Buǵan qosa, mamyrdaǵy salyq kezeńi kompanııalardyń teńgege degen suranysyn kúsheıtti. Mindettemelerin oryndaý úshin bıznes ókilderine kóbirek ulttyq valıýta qajet bolǵandyqtan, eksporttan túsken valıýtalyq tabystyń bir bóligi ishki naryqta aıyrbastalyp jatyr.
Osynyń nátıjesinde naryqtaǵy dollar usynysy ýaqytsha suranystan joǵary qalyptasty. Sarapshylar qazirgi teńge nyǵaıýynyń basty sebebi osy faktorlarmen baılanysty ekenin aıtady.
«Álemdegi eń tartymdy valıýtanyń biri»: Tımýr Súleımenov teńgeniń nyǵaıýyna qatysty pikir bildirdi
Boljamda qazirgi dınamıka bir rettik qubylys emes, naryqtaǵy tepe-teńdiktiń nátıjesi retinde baǵalanǵan. Munaı naryǵyndaǵy qolaıly jaǵdaı saqtalǵan kezde ekonomıkaǵa keletin valıýta kólemi syrtqy tólemder qajettiliginen asyp túsedi. Shıkizattyq ekonomıka úshin bul mańyzdy kórsetkish sanalady. Sebebi baǵam qysqa merzimdi emosııalyq ózgeristerge emes, naqty valıýtalyq túsim aǵynyna beıimdele bastaǵan.
Sonymen qatar mamyrdyń ekinshi jartysynan keıin salyq kezeńiniń áseri álsireýi múmkin. Mundaı jaǵdaıda naryq ımporttyq tólemderge, dıvıdendtik aýdarymdarǵa jáne jahandyq syrtqy faktorlarǵa qaıtadan táýeldi bola túsedi.
