Shynynda ótip bara jatqan jyl kásipqoı boksshy Gennadıı Golovkınniń abyroıyn burynǵydan da asyryp, ataǵyna ataq qosqan aıtýly jyl boldy. Osydan birneshe kún buryn elimizdiń sport jýrnalısteri ony «Qazaqstannyń 2014 jylǵy eń úzdik sportshysy» dep tanydy. Al Amerıkanyń USA Today basylymy «Jyl boksshysy» dep atady. Taǵy bir qaýym aldaǵy 2014 jyl álden qaraǵandylyq qabylan úshin budan da joǵary belesterdiń kezeńi bolady dep kesip-piship otyr.
Shynynda ótip bara jatqan jyl kásipqoı boksshy Gennadıı Golovkınniń abyroıyn burynǵydan da asyryp, ataǵyna ataq qosqan aıtýly jyl boldy. Osydan birneshe kún buryn elimizdiń sport jýrnalısteri ony «Qazaqstannyń 2014 jylǵy eń úzdik sportshysy» dep tanydy. Al Amerıkanyń USA Today basylymy «Jyl boksshysy» dep atady. Taǵy bir qaýym aldaǵy 2014 jyl álden qaraǵandylyq qabylan úshin budan da joǵary belesterdiń kezeńi bolady dep kesip-piship otyr.
Ár nárseniń bir sebebi bolady. Teginde Gennadıı Golovkınniń bulaısha barsha jurttyń janarynda qalyqtap, ynta-yqylasyna bólenýine onyń bıylǵy jyly tórt márte sharshy alańǵa shyǵyp, sonyń tórteýin de merziminen buryn aıaqtaǵany aıryqsha áser etse kerek. WBA boljamy boıynsha álemniń orta salmaqtaǵy sýperchempıony bolyp sanalatyn jerlesimiz osy urystardyń bárin erekshe bir ekpinmen, jańasha bir jigermen ótkizdi.
Al bedeldi amerıkalyq basylymnyń joǵarydaǵy «Jyl boksshysy» degen atalymy úshin talas reseılik Sergeı Kovalev pen kanadalyq Adonıs Stıvenson úsheýiniń arasynda ótipti. Dáýir kókjıeginen ketip bara jatqan jyly bulardyń úsheýi de rıngke tórt retten shyǵypty. Osynyń ózi búgingi tańdaǵy kásipqoı bokstaǵy elıtaly bylǵary qolǵap sheberleri úshin sırek kezdesetin derek bolyp tabylady. Bular sonyń tórteýinde de jeńiske jetken. Sonyń ishinde Kovalev qarsylastarynyń bárin tórtinshi raýndtan aryǵa jibermeı, talqandap otyrǵan. Alaıda, USA Today basylymy túıindi sál basqasha túıgen. Onyń sarapshylary sondyqtan: «Biraq onyń «tórttigi» buryn eshqashan birinshi raýndta jeńilip kórmegen álemniń jartylaı aýyr salmaqtaǵy eks-chempıondary Tavorıs Klaýd pen Ched Doýsondy tizerletken Stıvensonnyń jeńisteri qalqasynda onshalyqty kórnekti bolyp kórine qoımaıdy», – dep bir túıdektetip ótedi de, eń sońynan: «Jeńimpaz Golovkınniń stıli, sheberligi, joıqyn soqqysy onyń televıdenıeden kórsetilgen barlyq aıqastaryn boks jankúıerleri úshin keremet tartymdy kórinister etip shyǵardy. Sol sebepti de biz tap osy Golovkındi «Jyl boksshysy» etip tańdadyq», – dep aǵynan aqtarylady. Budan basqa, amerıkalyq basylym Genaǵa brıtanııalyq Mettıý Makklınmen ótkizgen shaıqasynyń úshinshi raýndynda qarsylasyna bergen dúleı soqqysy úshin yntalandyrý syılyǵyn da tapsyrypty.
Osy tusta Amerıkanyń Bleacher Report atty tanymal saıty Gennadıı Golovkınniń bir jyldyń ishinde kelesheginen úlken úmit kúttiretin qatardaǵy boksshydan sýper juldyz dárejesine deıin jetip úlgergen tarlan talant ekenin erekshe atap ótti. Al bizdiń jerlesimizge osynshalyqty bıik baǵa berilip, joǵary ataqtar tańylýyna sebep bolǵan urystardyń ilkisi ústimizdegi jyldyń 13 qańtarynda Nıý-Iorkte tegi meksıkalyq AQSh boksshysy Gabrıel Rosadomen ótip edi. Sol joly Gena óziniń WBA boljamy boıynsha álem chempıony degen ataǵyn altynshy márte, IBO nusqasy boıynsha úshinshi ret qorǵady. Sonymen birge, bul onyń NVO telearnasynan kórsetilgen ekinshi jekpe-jegi boldy. Biraq bul jurttyń birazy aldyn ala bal ashqandaı, birden Rosadanyń muryny jer ıiskeıtindeı teketires bolǵan joq. Kerisinshe óz jankúıerleriniń qýatty qoldaýyna súıengen alań ıesi alǵashqydan aryndap alǵa umtyldy. Bir kezde qarsy shabýyl taktıkasyna jaqsy enip alǵan ol birte-birte dál soqqysynyń sanyn da arttyra tústi. Degenmen, bul judyryq siltester keıin kele Golovkınniń aýanyń apshysyn qýyryp baryp, qarsylasyn qaryp túsetin súrgin súrmelerine qaraǵanda, balanyń oıynshyǵyndaı ǵana bolyp kórine berdi. Aqyrynda qarsy jaqtyń komandasy óz baǵlandarynyń múshiniń kúshi basym qazaqstandyq boksshynyń surapyl tegeýrinine tótep bere almaı bara jatqanyna anyq kózderi jetkesin, ortaǵa oramal tastap, saýǵa surady. Sóıtip, Gennadıı urysty 7 raýndta tehnıkalyq nokaýtpen aıaqtady.
Qaraǵandylyq qarshyǵanyń el esinde qalǵan ekinshi shaıqasy 30 naýryz kúni Monako kinázdiginiń Monte-Karlo qalasynda kógen jazdy. Ol osynda japon juldyzy Nobýhıro Isıdamen qolǵap túıistirdi. Bul joly Gena birinshi bolyp alǵa tartty. Biraq ójet japon da keri shegine qoımady. Degenmen, chempıonnyń shirene tastaǵan sheńberleri Okınava oǵlanyn biraz teńseltip te tastady. Alǵashqy eki raýnd osylaısha Golovkınniń ústemdigin úlpildetip kórsetti. Jurt bul kezde onyń osynshalyqty aýyr soqqylarǵa tótep berip turǵan básekelesine de qaıran qala bastap edi. Joq, uzamady, úshinshi raýnd aıaqtala bergen shamada bizdiń baǵlan taıtalasqan tarlanyn kesken terekteı sulatyp túsirdi. Nokaýt! Buǵan Gena sol qolymen apperkot jasap, japonnyń oń qulaǵyn japyra soǵýy arqyly oıaǵa keltirdi.
Shahterler shaharynyń shákirti Amerıkanyń Mashantaket qalasynda aǵylshyn Mettıý Makklınmen bolǵan úshinshi kezdesýinde osylaı taza nokaýtpen aıaqtady. Bul joly da ol úshin jeńistiń jalaýy úshinshi raýndta jelbiredi. Joǵarydaǵy basylymnyń tartymdy tartýyna ıe bolǵan bul shaıqas ta qazaqstandyqtyń aıqyn basymdyǵyn tanytty. Biraq urys eki jaqty da qaıtpaı urys salýy arqyly órbip ala jóneldi. Qazaqstandyq jigit raýndtyń sońǵy shıregi kelgende ǵana óziniń artyqshylyǵyn kórsetip úlgerdi. Aldymen onyń tikeleı urǵan krosy kózdegen jerine birinshi ret dál tıip, sońynan sol qolymen bergen hýgi Makklındi shatqaıaqtatyp jiberdi. Al, úshinshi raýndta bárin Genanyń bir soqqysy sheship ketti.
Golovkın tórtinshi shaıqasyn da AQSh jerinde ótkizdi. Taǵy Nıý-Iorktiń ataqty «Medıson Skver Garden» saraıynda kerýen kergen kezdesý endi amerıkalyq Kertıs Stıvenstiń shama-sharqyn baıqaýǵa arnaldy. Munda Gena qarsylasyn tórt ret nokdaýnǵa jiberdi. Alǵash ret ekinshi raýndta oryn alǵan sondaı surapyl soqqy Kertısti segizinshi raýndta úsh ret qolymen jer tireýge májbúr etti. Osydan keıin alańdaǵy arbıtr urysty aıaqtaýǵa pármen berdi.
Qazaqstandyq kásipqoı boksshy Gennadıı Golovkınniń 2013 jyldyń júlgesindegi jeńisti joryqtarynyń jaı-japsary osyndaı. Baýyrynyń osy tolaǵaı tabystary oǵan jattyqtyrýshy bolyp qyzmet etip kele jatqan egiz syńary Maksım Golovkınge de bıyl qut bolyp darydy. Ol jaqynda ǵana «Qazaqstannyń eńbek sińirgen jattyqtyrýshysy» degen joǵary ataqqa ıe boldy.
Al biz bıylǵy jylǵy sáýir aıynda Qazaqstan halqy Assambleıasynyń HH sessııasynda sóılegen sózinde: «Meniń ákem – orys, anam – koreı qyzy, al men – qazaqpyn!», – degen málimdemeni taza qazaq tilinde jetkizgen Gennadıı Golovkınniń jeńisterine aldaǵy ýaqyttarda da qýana qol soǵýdan úmittimiz.
Serik PIRNAZAR,
«Egemen Qazaqstan».
