Ulttyq birlik pen kelisim – baǵa jetpes qundylyq

Is-sharaǵa Aqparat jáne qoǵamdyq damý mınıstri A.Balaeva, Qazaqstan halqy Assambleıasy Tóraǵasynyń orynbasarlary Z.Kýzıev pen M.Bekbaeva, Qazaqstan halqy Assambleıasynan saılanǵan Parlament Májilisiniń depýtattary, Nur-Sultan, Almaty, Shymkent qalalary men oblystar ákimderiniń orynbasarlary, QHA músheleri, etnomádenı birlestikter men jastar qanatynyń ókilderi jáne t.b. qatysty.

Dóńgelek ústel barysynda qaty­sýshylar Táýelsizdiktiń 30 jyldyǵy men Tuńǵysh Prezıdent – Elbasy belgilegen Alǵys aıtý kúni­niń 5 jyldyǵynyń biriktirýshi mańy­zyn, qazaqstandyq qundylyqtar – ult­tyq birlik pen kelisimdi, qoǵamdyq ynty­maqtastyq pen ózara qoldaýdy, dostyq dástúrlerin jańa urpaqqa jetkizýdi beıneleıtinin sóz etti.

Is-sharany ashqan Memlekettik hatshy bıyl Táýelsizdigimizdiń 30 jyldyǵyn atap óte otyryp, Alǵys aıtý kúnin erekshe ma­ǵynaǵa bóleıtinimizdi basa aıtty. «Biz táýelsiz Qazaqstannyń qury­lýy men damýynyń bastaýynda bol­ǵan adam­darǵa úlken alǵysymyzdy bil­dir­gimiz keledi. Eń aldymen, biz ata-baba­lary­myzdyń azattyq pen egemendik týraly ǵasyrlar boıǵy armanyn júzege asyr­ǵany úshin Tuńǵysh Prezıdentimiz – Elbasy Nursultan Ábishuly Nazarbaevqa tereń alǵysymyzdy bildirýimiz kerek», dedi.

Q.Kósherbaev zamanaýı syn-qater­lerge beıimdelgen sapaly jańa ulttyq biregeılikti qalyptastyrýdyń qazirgi zamanǵy jaǵdaıynda el Prezıdenti Qasym-Jomart Toqaevtyń saıası jáne ekonomıkalyq reformalarmen qatar qoǵamdyq sanany jańǵyrtýǵa úlken kóńil bólip otyrǵanyn atap ótti.

Memlekettik hatshynyń aıtýynsha, mysaly bizdiń qoǵamdy rýhanı jań­ǵyrtýdyń mańyzdy baǵyty saıası qýǵyn-súrgin qurbandaryn tolyq aqtaý jónindegi aýqymdy jumystardy aıaqtaý bolýy kerek. «Totalıtarızmnen zardap shekken kóptegen halyq úshin qazaq jeri naǵyz baspanaǵa aınaldy. Tarıhı ádilettilikti qalpyna keltirý, ádiletsiz sottalǵandardyń adal esimin qaıtarý – mine, biz ózimizge rızashylyq bildiretin urpaqtardyń jadynda osyny qaldyrýymyz kerek. Bul sondaı-aq asharshylyqtyń qaıǵyly saldaryna, «Alash» qozǵalysynyń jetekshilerin joıýǵa, kóptegen shynaıy patrıottyń taǵdyryna, halqymyzdyń tarıhyn burmalaý áreketterine de qatysty», dedi ol.

Sóz sońynda Memlekettik hatshy qazaqstandyqtarǵa árqaısynyń ıgiligi men elimizdiń órkendeýi jolyndaǵy kúndelikti eńbekteri úshin alǵys bildirdi.

Sondaı-aq «Tuńǵysh Prezıdent jolymen – beıbitshilik pen kelisimge 30 jyl» halyq ekspedısııasy» QHA jobasynyń jáne «Qaıyrymdylyq kerýeni: 30 ıgi is» qaıyrymdylyq mara­fo­ny­nyń tu­saý­keseri ótip, túrli sala men aza­­­mat­tyq qoǵam, etnomádenı bir­les­tik­ter­diń ókilderi men stýdentter sóz sóıledi.

* * *

Respýblıka Prezıdentiniń 2016 jylǵy 14 qańtardaǵy №173 Jarly­ǵymen Qazaqstanda Alǵys aıtý kúni bel­gilendi.

Tuńǵysh Prezıdent – Elbasy Nursultan Nazarbaev Qazaqstan halqy Assambleıasynyń XXII sessııasynda «qazirgi Qazaqstandy mekendegen etnostyq toptardyń ortaq tarıhı taǵdyry halyqtyń dilinde, onyń ómirlik kózqarastary men umtylystarynda jaǵymdy kórinis taýyp, barlyq etnosqa ortaq qundylyqtar men ıdealdardy qalyptastyrǵanyn» atap ótti.

Kóp etnosty Qazaqstan halqynyń qa­lyp­tasý tarıhyn asha otyryp, Elbasy Alǵys aıtý kúni týraly: «Qazaq­­stan halqy Assambleıasy quryl­ǵan kún –
1 naý­ryzdy jyl saıyn bar­lyq etnos­tyń bir-birine meıirban­dyq tany­typ, adamdardy óz týǵa­nyndaı qa­byldaǵan qazaqtarǵa alǵys aıtý kúni retinde atap ótý ádilet­ti bolar edi. Ol kún bizdi burynǵydan da góri ja­qyndastyra túspek. Bul kún meıirimdiliktiń, búkil qazaqstandyq­tyń bir-birine degen dostyǵy men mahabbatynyń jarqyn merekesi bola alar edi», degen usynys jasaǵan bolatyn.