Tarıh • 02 Naýryz, 2021

Máýlen Áshimbaev: Ultqa adal eńbek etýdiń ozyq úlgisin kórsetken tekti azamattardyń biri - О́mirbek Joldasbekov

310 ret
kórsetildi
3 mın
oqý úshin

Qoǵam jáne memleket qaıratkeri, ǵalym, akademık, tehnıka ǵylymdarynyń doktory О́mirbek Joldasbekov ekeni daýsyz. Kúni keshe birtýar tulǵanyń týǵanyna 90 jyl toldy. Bul týraly Senat Tóraǵasy Máýlen Áshimbaev óziniń Facebook paraqshasynda jazdy, dep habarlaıdy Egemen.kz

Máýlen Áshimbaev: Ultqa adal eńbek etýdiń ozyq úlgisin kórsetken tekti azamattardyń biri  - О́mirbek Joldasbekov

Qazaqta ultqa adal eńbek etýdiń ozyq úlgisin kórsetken tekti azamattar az emes. Solardyń biri de biregeıi kórnekti qoǵam jáne memleket qaıratkeri, ǵalym, akademık, tehnıka ǵylymdarynyń doktory О́mirbek Joldasbekov ekeni daýsyz. Kúni keshe birtýar tulǵanyń týǵanyna 90 jyl toldy.

Jalpy, О́mirbek Joldasbekov dese, eń aldymen, eske elimizdegi kóptegen azamat bilim alǵan qara shańyraq qazirgi Qazaq Ulttyq ýnıversıteti, burynǵy KazGÝ túsedi. О́ıtkeni О́mirbek Aryslanuly 16 jyl boıy osy ýnıversıtetti basqaryp, ony elimizdiń ǵana emes, búkil Keńes Odaǵynyń mańdaıaldy joǵary oqý oryndarynyń birine aınaldyrdy. Jańa mamandyqtar, kafedralar jáne zerthanalardyń dál osy Joldasbekovtiń tusynda kóptep ashylǵany barshaǵa belgili. Al, KazGÝ qalashyǵynyń salynýyna sińirgen eńbegi óz aldyna bólek áńgime.

О́mirbek Aryslanulynyń nebári 39 jasynda eldegi eń basty joǵary oqý ornynyń tizginin ustaýy onyń qanshalyqty bilimdi ári bilikti bolǵanyn ańǵartady. Qaıratker 1986 jyly rektorlyqtan ketkenimen, 1988 jylǵa deıin KazGÝ-de eńbek etti. Biz de dál sol jyly osy ýnıversıtetke oqýǵa túsken edik. Ol kezder bilim ordasynda Joldasbekov dáýiriniń jalyny áli basyla qoımaǵan kezeń bolatyn. Sondyqtan áıgili rektordyń dúrildep turǵan shaǵynda oqymasaq ta, onyń sheber uıymdastyrýshy, naǵyz reformator ekenin stýdent kezimizden sanaǵa toqydyq. KazGÝ-diń túlegi retinde О́mirbek Aryslanulynyń jastarǵa jasaǵan jaqsylyqtaryn eshqashan umytpaımyz.

Aǵamyzben ómir jolymyz 1994-1995 jyldary táýelsiz Qazaqstannyń Joǵarǵy Keńesinde túıisti. Men ol kezde atalǵan organnyń apparatynda jumys isteımin. Al О́mirbek Joldasbekov Joǵarǵy Keńestiń depýtaty, Ǵylym, bilim jáne jańa tehnologııalar komıtetiniń tóraǵasy edi. Sol jyldary О́mirbek Aryslanulynyń iskerligine, tabandylyǵyna jáne parasattylyǵyna kýá boldyq. Onyń bári bizge ómirlik azyqqa aınalǵan sabaq boldy desem, qatelespeıtin shyǵarmyn.

Keıin elimizde qos Palataly Parlament qurylyp, О́mirbek Joldasbekov Májilis depýtaty boldy. Sol arqyly otandyq parlamentarızmniń qalyptasýyna jáne ózi ańsaǵan táýelsizdikti nyǵaıtýǵa úlken úles qosty. Bar bilimi men tájirıbesin, qajyr-qaıraty men qarym-qabiletin egemen eliniń erteńi úshin jumsaǵan aǵamyz ómiriniń sońyna deıin halqyna qaltqysyz qyzmet etti.

Sondyqtan qashanda ulttyq múddeni bárinen bıik qoıǵan, batyl bastamalary arqyly elimizdiń ǵylymy men bilimine tyń serpin bergen, Injenerlik akademııanyń jáne Mehanıka-matematıka ınstıtýtynyń negizin qalaǵan, ǵalymdyǵyn búkil dúnıe júzi moıyndaǵan taý tulǵanyń ónegeli ómiri men ǵylymı murasyn dáripteý, ustaz rýhyna taǵzym etý – búgingi býyn men keler urpaqtyń abyroıly mindeti. Aǵamyzdyń jatqan jeri jaryq, topyraǵy torqa bolsyn.