Oblys ortalyǵynda ótip jatqan qusbegilerdiń respýblıkalyq XV chempıonatyna onnan astam búrkitshi qatysty. Búrkit qana emes, ıtelgi men qarshyǵa ushyrǵandar da boldy.
Ulttyq sport qaýymdastyǵynyń uıymdastyrýymen ótip jatqan jarystyń sharty boıynsha alǵashqy kúni qustardy shyrǵaǵa salyp, irikteýden ótkizdi. Ekinshi kúni irikteýden ótkenderi qoıanǵa tústi. Búrkittiń tegeýrini kóringende, qoıandar shalt burylyp qasha ma dep edik, joq, kerisinshe jata qalysty. Qolda ósken qoıandar ǵoı, orǵı jónelmedi. Áı biraq, qasqyrǵa túsip júrgen qyrannan qoıanyń qalaı qashsa da qutylsyn ba?!
Qolyna búrkit qondyryp, beline kúmis belbeý taqqan búrkitshilerge rıza kózben qarasty bári. Ulttyq qundylyqty dáriptep júrgen azamattar ǵoı. Júırik baptap, báıgege qosý qandaı qıyn bolsa, qyran qustyń baby da odan kem túspeıdi.
– Jeti atamyzdan beri bosaǵamyzdan qus ketpegen. Atadan mura bolyp kele jatqan soń, búrkit baptap otyrmyz. Kók baıraǵymyzda da beınelengen qasıetti qus. Baby endi, qıyn. Jas et taýyp berý de ońaı emes, – deıdi úrjarlyq qusbegi Yryzdyq Qaseıin.
Aqsaqal aıtqandaı, kúndelikti azyǵy bar, qoıasyn alý degendeı kútimderi taǵy bar. Qus jyrtqysh bolǵandyqtan, ara-tura ańǵa salyp turý kerek. Úrjar óńiri Ulttyq parktiń aýmaǵynda jatqandyqtan, qyrandy túz taǵysyna túsirýge tyıym salynǵan. Sol úshin Yryzdyq Qaseıin búrkitin úı qoıanyna salyp turady.
Sonymen úsh kúnge sozylǵan jarys qorytyndysy boıynsha III oryndy Almaty oblysynan kelgen Aıan Seıitjan qanjyǵasyna baılady. II júldeli oryn sonaý Atyraýdan Altaıǵa at arytyp kelgen Arman Qoshqarovqa buıyrdy. Al I oryn Úrjar aýdanynan kelgen búrkitshi Nuǵym Qaıdarulyna berildi.
Shyǵys Qazaqstan oblysy
