Kezdesýde Eýrazııalyq ekonomıkalyq odaqtyń strategııalyq damý máseleleri jáne Qazaqstan Respýblıkasynyń uıymǵa bıylǵy tóraǵalyǵy kezindegi basym baǵyttary talqylandy.
Qasym-Jomart Toqaev Eýrazııalyq ekonomıkalyq odaq týraly sharttyń tolyqqandy júzege asyrylýynyń mańyzdylyǵyn atap ótti.
Áńgimelesý barysynda ózara saýdadaǵy kedergilerdi joıýǵa jáne Odaq sheńberinde óndiristik kooperasııany damytýǵa erekshe nazar aýdaryldy. Eýrazııalyq ekonomıkalyq odaqtyń sıfrlyq kún tártibin iske asyrýdyń, ónerkásipte, aýyl sharýashylyǵynda jáne kedendik retteýde sıfrlyq tehnologııalardy engizýdi jedeldetýdiń mańyzdylyǵy atap ótildi. Sondaı-aq komıssııa jumysynyń tıimdiligin arttyrý boıynsha usynystar qarastyryldy.
Taraptar Eýrazııalyq ekonomıkalyq odaqtyń úshinshi eldermen jáne halyqaralyq uıymdarmen (Eýrokomıssııamen, Dúnıejúzilik saýda uıymymen, Ońtústik-Shyǵys Azııa memleketteri qaýymdastyǵymen jáne t.b.) saýda-ekonomıkalyq qatynastardy jolǵa qoıý qajettigin atap ótti.
О́z kezeginde Mıhaıl Mıasnıkovıch Komıssııanyń bıylǵy jumystary men basymdyqtary jáne 2025 jylǵa deıingi strategııalyq damý josparyn júzege asyrý jaıynda aıtty. Sonymen qatar ol Prezıdent Qasym-Jomart Toqaevtyń jýyrdaǵy úndeýinde aıtylǵan Qazaqstan tóraǵalyǵynyń basym baǵyttaryn oryndaý jónindegi Komıssııanyń josparymen bólisti.
EEK alqasynyń tóraǵasy Qazaqstan Prezıdenti aıtqan naqty usynystar men bastamalardy qoldady. Mıhaıl Mıasnıkovıchtiń aıtýynsha, Eýrazııalyq ekonomıkalyq odaqtyń jumysy bıznes qoǵamdastyq arasyndaǵy yqpaldastyqty jandandyrýǵa, qosymsha qun qalyptastyryp, jańa jumys oryndaryn ashyp otyrǵan kásiporyndardy qoldaýǵa baǵyttalady. Budan bólek jas kásipkerlerdi demeýge de basymdyq beriledi.
Kezdesý qorytyndysy boıynsha 2021 jyldyń mamyr aıynda Qazaqstanda Joǵary keńestiń kezekti otyrysyn ótkizý jóninde sheshim qabyldandy. Atalǵan jıyn aıasynda Eýrazııalyq iskerlik forýmyn ótkizý josparlanyp otyr
