«Áleýmettik medısınalyq saqtandyrý qorynyń» basqarma tóraǵasy Bolat Tókejanovtyń aıtýynsha, mindetti medısınalyq saqtandyrý júıesi qazirgi tańda 16 mln qazaqstandyqty nemese el turǵyndarynyń 84 paıyzyn qamtyǵan. 3 mıllıonnan astam adam saqtandyrý ıgiligin kórealmaı otyr. Olardyń 1,6 mln-ynda tólem turaqty júrgizilmegen, 1,4 mln-y jyl boıy birde-bir ret aýdarym jasamaǵan.
– Jazda, 42 500 teńge tólemi júrip jatqan kezde jeke tulǵalar biryńǵaı jıyntyq tólem jasady. Osy úrdis saqtalǵan bolsa MÁMS júıesi el turǵyndarynyń 92 paıyzyn qamtýshy edi. Halyqty MÁMS-ke tartý boıynsha júıeli jumystardy jalǵastyrý qajet. О́ńirdegi ákimdikter «Atameken» kásipkerler palatasyn, memlekettik kirister komıteti aýmaqtyq bólimderin jáne medısınalyq uıymdardy tarta otyryp aımaqtyq shtabtardyń tıimdiligin arttyrýy kerek, – dedi Tókejanov.
Ásirese, Jambyl, Túrkistan, Almaty, Qostanaı oblystarynda saqtandyrylǵan azamattar sany 80 paıyzdan tómen kórsetkishke ıe eken.
Byltyr medısınalyq saqtandyrý júıesine jarnalar men aýdarymdar túrinde 550 mlrd teńge kelip túsken. 15 jeńildik kategorııasy boıynsha memlekettik transh 297,6 mlrd teńgeni quraǵan. Bul barlyq túsimderdiń 54 paıyzy. Jumys berýshiler óz jumysshylary úshin 162 mlrd teńge aýdarǵan.
– Jumysshylar jarnasy 72,2 mlrd teńge boldy. Jeke kásipkerler 10,4 mlrd teńge, azamattyq-quqyqtyq negizde jumys isteıtin azamattar 2,3 mlrd teńge, biryńǵaı jıyntyq tólem tóleýshiler 2,8 mlrd teńge, óz-ózin jumyspen qamtýshylar 2,3 mlrd teńge aýdardy. MÁMS júıesine aýdarym jasaý boıynsha Nur-Sultan, Almaty qalalary jáne Qaraǵandy oblysy kósh basynda. Batys Qazaqstan, Qyzylorda, Soltústik Qazaqstan oblystarynda tólem deńgeıi tómen, – deıdi spıker.
Resmı derek boıynsha, 2020 jyldyń qorytyndysynda qor aktıvteri esebinen stasıonarlarda 1 mln-nan astam naýqas emdelgen. Osy maqsatta 170 mlrd teńge jumsalǵan.
