Alaıda 3 naýryz kúni Qazaqstan qor bırjasyndaǵy (KASE) dollardyń ortasha kýrsy 419,83 teńgeni qurady. Árıne, valıýta baǵamynyń qubylyp turýy bizge tańsyq emes. Sondyqtan onyń jıi qunsyzdanyp nemese nyǵaıýyna qatysty Ulttyq bank ókiliniń málimdemesi qaı sátte de mańyzdy bolmaq.
Ulttyq Bank monetarlyq operasııalar departamentiniń dırektory Nurjan Tursynhanovtyń aıtýynsha, teńgeniń álsireýi úsh basym faktorǵa: OPEK+ otyrysy qarsańynda munaıǵa baǵa belgileýdiń quldyraýyna, dollardyń nyǵaıýyna jáne Qazaqstandaǵy salyq tólemderi kezeńiniń aıaqtalýyna baılanysty boldy.
– Aptanyń basynan bastap munaıdyń baǵasy ótken aptada qol jetkizgen eń joǵary kórsetkishterden aýytqyp, 5,1 paıyzǵa tómendedi. Koronavırýsqa qarsy vaksınalaýdyń ilgerileýi, Saýd Arabııasy tarapynan munaı óndirýdi sáýirge deıin kúnine 1 mln barrelge erikti túrde qysqartý, sondaı-aq AQSh-ta buryn-sońdy bolmaǵan aıazǵa baılanysty munaı óndirýdi májbúrli túrde toqtata turý jyl basynan beri munaı baǵasynyń ósýin qoldaı tústi, – deıdi Tursynhanov.
Endi aldaǵy ýaqytta munaı óndirisine qoıylǵan shekteýler birtindep alyna bastaıdy. Sarapshylar OPEK+ munaı óndirýdi kúnine shamamen 0,5 mıllıon barrelge ulǵaıtady dep boljaıdy
– Kóktemniń alǵashqy kúninde AQSh pen Eýropanyń qor bırjalary aıtarlyqtaı paıdamen jabyldy. Senbi kúni AQSh О́kilder palatasy ekonomıkaǵa 1,9 trln dollarǵa kómek sharalarynyń toptamasyn bekitti. Prezıdent Baıden demalys kúnderi senatty tez áreket etýge shaqyrdy. Paıyzdyq mólsherlemelerdiń kóterilýine qatysty ınvestorlardyń alańdaýshylyǵyn báseńdetip, bir aptaǵa sozylǵan Amerıka memlekettik oblıgasııalarynyń kiristilik rallıi toqtady. Osyǵan baılanysty DXY dollar ındeksi 90,1-den 91,2-ge deıin nemese 1,2 paıyzǵa ósti. Sonymen qatar, ótken aptada Qazaqstanda shetel valıýtasyn satýdyń neǵurlym joǵary kólemin boljaıtyn jáne tıisinshe ulttyq valıýtanyń nyǵaıýyna yqpal etetin kezekti salyq kezeńi aıaqtalǵanyn atap ótken jón, – delingen Tursynhanov málimdemesinde.
