– Bıyldyń ózinde áıelder kásipkerligin damytý boıynsha 17 ortalyq ashylyp, jumys isteı bastaıdy, ıaǵnı elimizdiń ár óńirinde bir-bir ortalyq bolady, – dedi mınıstr.
Ortalyqtardyń ashylýy ulttyq ekonomıka mınıstrligi, «Atameken» palatasy jáne QR Prezıdenti janyndaǵy Áıelder isteri jáne otbasylyq-demografııalyq saıasat jónindegi Ulttyq komıssııa arasyndaǵy áıelder kásipkerligin damytý boıynsha áriptestik jáne yntymaqtastyq týraly qol qoıylǵan kelisim sheńberinde kózdelip otyr. Kelisim áıelderdiń qoǵamdyq-saıası ómirdegi ekonomıkalyq múmkindigin keńeıtýdi qarastyrady.
– Qujat áıel kásipkerligin damytý, oqytý, kooperasııa jáne qajetti quziretterdi qalyptastyrý arqyly olardyń ekonomıkalyq belsendiligin yntalandyrý, sondaı-aq bıznesti qoldaý baǵdarlamalary sheńberinde jeńildetilgen kredıtter men granttar berý, áıelderdi jumyspen qamtamasyz etý, áıelder men olardyń uıymdary óndirgen taýarlar men qyzmetterdi damytýǵa járdemdesý máseleleri boıynsha taraptardyń ózara is-qımylyn kózdeıdi» delingen ulttyq ekonomıka mınıstrligi málimdemesinde.
Mınıstrdiń aıtýynsha, áıelder kásipkerligin damytý boıynsha tıimdi sharalardy ázirleý úshin ákimdikter men damý ınstıtýttary janynda jumys istep jatqan áıelderdi qoldaý ortalyqtary men qyzmetteriniń jumysy belsendi zerttelýde.
– Ortalyqtar áıelderdiń kásipkerlik bastamasyn iske asyrýǵa qýatty serpin bere otyryp, áıelderdi aqparattyq jáne konsýltasııalyq qoldaýdyń negizgi kózine aınalady. Áıelderdiń ekonomıkadaǵy róliniń kúsheıýi ekonomıkalyq ósý men qoǵamnyń damýyna yqpal etetinine senimdimin, – dedi mınıstr.
Bıznesti qoldaý jónindegi memlekettik baǵdarlamalar monıtorınginiń derekteri boıynsha memleketten qarjylaı qoldaý alatyn kásipker áıelderdiń úlesi shamamen 32 paıyzdy quraıdy. Qarjylaı emes qoldaý jobalarynyń jartysyna jýyǵy (45 paıyz) – áıel-kásipkerlerdiń qatysýymen iske asyrylady. Mınıstrlik pen Eýropa qaıta qurý jáne damý banki arasyndaǵy yntymaqtastyq sheńberinde 300-ge jýyq kásipker áıel jergilikti konsýltanttardan konsýltasııalyq kómek alyp, 35,4 mlrd.teńge somasynda 21,8 myń kredıt berilgen.
