Qoǵam • 05 Naýryz, 2021

Qorǵanys mınıstri aıaýly arýlardy 8 naýryz merekesimen quttyqtady

20 ret kórsetildi

Qorǵanys mınıstrliginde Halyqaralyq áıelder kúnine arnalǵan saltanatty is-shara bolyp ótti, dep habarlaıdy Egemen.kz.

 

Qorǵanys mınıstri general-leıtenant Nurlan Ermekbaev áskerı qyzmetshi arýlardy, azamattyq personaldy, ardager áskerı qyzmetshi áıelderdi jáne áskerı qyzmetshilerdiń aıaýly jarlaryn kele jatqan merekemen quttyqtady.

– Jany názik bolsa da, kúsh-jigeri myqty áskerı qyzmetshi qyzdar qyzmettik mindetterin orasan zor jaýapkershilikpen atqarady. Áıel zaty bar ujymda árqashan uıymshyldyq, ózara qurmet, iltıpat uıalaǵan, – dep atap ótti ol óziniń quttyqtaýynda.

Qorǵanys mınıstri áskerı qyzmetshilerdiń aıaýly jarlaryna da rızashylyǵyn bildirdi.

– Biz, er-azamattar, otbasynyń uıytqysy bolǵanyńyz, meıirimdiligińiz ben qamqorlyǵyńyz úshin sizderge qaryzdarmyz. Áıel zatyna tán qasıetter er-azamattyń kúsh-jigerin arttyryp, kez kelgen qıyndyqty jeńýde qýat beredi, ómirimizdi jarqyn ári shýaqty etedi, – dep atap ótti Nurlan Ermekbaev.

Qorǵanys vedomstvosynyń basshysy áıel danalyǵy men qamqorlyǵy, eńbekqorlyǵy men kez kelgen qıyndyqqa tóze bilý qasıeti Táýelsiz Qazaqstannyń qorǵanys qabiletin nyǵaıtý isinde mańyzdy faktor bolyp tabylatynyn atap óte otyryp, Otan aldyndaǵy qasıetti boryshyn adal ótkerip júrgen Otan qorǵaýshylarymyzdyń analaryna da shyn júrekten rızashylyq sózderin jetkizdi.

Búgingi kúni áıelder Qarýly Kúshterdiń barlyq salasynda aıanbaı qyzmet etýde. Olar er-azamat meńgergen barlaýshy, desantshy, mergen, áskerı ushqysh mamandyǵyn biliktilikpen atqarýda

Qazaqstannyń Qarýly Kúshterinde jeti myńnan astam áskerı qyzmetshi arý qyzmet ótkerýde. Olardyń 913-i ofıser, al 20-sy polkovnık.  Tórt áskerı qyzmetshi áıel shtabtyq ofıserler men áskerı baıqaýshylar retinde BUU-nyń Batys Saharadaǵy jáne Lıvandaǵy mıssııalaryna qatysty. Shamamen bes myń áıel azamattyq personal retinde jumys isteıdi.

Sońǵy jańalyqtar

Uqsas jańalyqtar