«Astana Balettegi» ǵajaıyp gala-konsert

Eki bólimnen quralǵan kesh baǵdar­la­masy negizgi on alty nómirge toptas­tyrylǵan. Teatr ártisteri klassı­ka­lyq muraǵa aınalǵan spektakl­der­diń úzindilerin kórkem horeografııa tilinde sheber oryndap shyqty.

Baǵdarlamamyzdyń óte mazmundy ári san alýan bolýyna barynsha nazar aýdardyq. Tipti keıbir partııalardyń sahnamyzda alǵash oryndalǵanyn atap ótýimiz kerek. Osy baǵdarlamany daıyndaǵan kezde, óz basym, kelip jet­ken kóktem shýaǵyn – jańa ómir tynysyn, mahabbat pen ińkár sezim­di jetkizgim keldi. Sondyqtan ár bı qushtarlyq, romantıkalyq, melan­ho­lııalyq sezim ıirimderi syndy mahab­bat­tyń san qyryn sýretteıdi, – dedi «Astana Balet» teatrynyń kórkemdik jetekshisi Nurlan Qanetov.

Konserttiń birinshi bóliminde S.Pýnı­diń «Esmeralda», P.Chaı­kovs­kıı­diń «Aqqý kóli», B.Asafevtiń «Parıj alaýy», K.Glıýktiń «Áýen», A.Adannyń «Korsar», P.Maskanıdiń «Diversity», P.Chaıkovskııdiń «Divine» syndy balet­terinen úzindi oryndaldy. Ásirese, al­ǵash­qy bólimdi túıindegen úsh teatrdyń je­tekshi solısteri, úzdik trıo – Farhad Bórıev, Bahtııar Adamjan men Janel Tókeevanyń Adolf Adan mýzykasyna qoıylǵan «Korsar» baletinen kórsetken kórkem izdenisi kórermen qaýymnyń zor yqylasyna bólendi.

 Al ǵalamat keshtiń ekinshi bólimin­de «Jızel» baletinen grand-pa, «Karmen-sıýıta» baletinen dýet, «Aqqý kóli» ba­le­tinen adajıo, Fedor Lopý­hov horeo­gra­fııasyndaǵy «Go­pak», «Spartak» baletinen dýet, «Shope­nıana» baletinen vals, Love Fear Loss baletinen dýet jáne «Don Kıhot» baletinen pa-de-de usynyldy. Bı keshiniń jarqyn kórinisiniń biri A.Hachatýrıan mýzykasyna horeograf Georgıı Kovtýn qoıǵan «Spartak» baletinen adajıo edi. Elordalyq teatr sahnasyna spektakl úzindisin «Astana Balet» teatrynyń kórkemdik jetekshisi, Reseıdiń eńbek sińirgen qaıratkeri Nurlan Qanetov kóshirdi. Spartak pen Frıgııanyń beınesin Farhad Bórıev pen Aınur Ábilǵazına somdady.

Sondaı-aq ańyzǵa aınalǵan aıtýly gala-konsertte Tatıana Ten, Qazbek Ahmedııarov, Dılara Shomaeva, Aıjan Muqatova, Ýeslı Karvalo, Eldar Sársembaev, Baljan Ábdirahmanova bas­taǵan «Astana Balet» teatrynyń je­tekshi solısteri men shaqyrylǵan ártister qata­ryn­da óner kórsetken – «Astana Opera» teatrynyń premeri Bahtııar Adamjan, Abaı atyndaǵy Qazaq UAOBT-nyń biregeı bıshileri Janel Tókeeva, Rahym Daıyrov pen Málıka Elshibaeva óneri elordalyq kórermen kóńiline kóktemniń ǵalamat shýa­ǵyn darytqandaı esten ketpes erekshe áser syılady.

О́ziniń jańashyl qoıylymdarymen kópshiliktiń ystyq yqylasyna bólenip júrgen «Astana Balet» trýppasynyń kórermenine naýryz aıynda usynar tartýy munymen áste shektelmek emes. Ujym osy aıda «Valpýrgıev túni» jáne «Gaııa» bir aktili baletteri men Ulys­tyń uly kúni – Naýryz meıramy qarsańynda «Ulttyq horeografııa keshin» elordalyq kórermender men qala qo­naqtary nazaryna usynýdy josparlap otyr. Sonymen qatar suhbat barysynda teatrdyń kórkemdik jetekshisi sáýir aıyndaǵy qoıylymdar jaıly da aıtyp qaldy. Kóp uzamaı kórermen kózaıymyna aınalǵan – «Beıbarys sultan», «Mahabbat týraly ańyz» jáne «Jızel» baletteri kórermenimen sahna tórinde qaıta qaýyshatyn bolady.