Esterińizge sala keteıik, 2021 jyldyń 10 naýryzynan bastap Almaty qalasy koronavırýstyń órshýine baılanysty «qyzyl aımaqta» tur. Keshe Almaty qalasynyń Bas memlekettik sanıtarlyq dárigeri «Almaty qalasynda koronavırýstyq ınfeksııa aýrýlarynyń aldyn alý boıynsha sharalardy kúsheıtý týraly» jańa qaýly shyǵardy, ol osy jyldyń 13 naýryzynan bastap kúshine enedi.
Epıdemııalyq jaǵdaıdyń nasharlaýyn eskere otyryp, shekteý sharalary dinı nysandarǵa da qatysty bolady. Atap aıtqanda, ǵıbadat nysandarynyń ǵımarattarynda áleýmettik qashyqtyqty (keminde 2 metr) jáne basqa da sanıtarlyq normalardy: maskalyq rejımdi, dezınfeksııany jáne t. b. qatań saqtaı otyryp, tek «jeke qulshylyq etý» rásimderin (ujymdyq rásimdersiz: juma namazy, jeksenbilik qyzmetter jáne t. b.) ótkizýge ruqsat etiledi.
О́z kezeginde dinı birlestikterdiń basshylyǵy dinı rásimderdi ótkizý úshin sanıtarlyq normalarǵa sáıkes keletin barlyq jaǵdaılardy qamtamasyz etý jóninde tıisti sharalar qabyldaýy qajet:
- Ǵımaratqa kirer aldynda kelýshilerdiń temperatýrasyn ólsheý;
- Betperdesiz azamattardy kirgizbeý;
- 2 metrden kem emes aralyqpen dinı birlestikter aýmaǵynda arnaıy jazylǵan belgiler jasaý;
- irgeles aýmaqty taza ustaýdy qamtamasyz etý.
«Sonymen qatar qalamyzdyń dinı birlestikteri basshylary men dindar jamaǵattan osy ýaqytsha shekteýlerge túsinistikpen qaraýlaryn suraımyn. Biz bundaı shekteýlermen birinshi ret tap bolyp otyrǵan joqpyz jáne barlyǵymyz birgelikte bul qıyndyqty birgelikte jeńemiz dep senemin. Sondaı-aq Din isteri basqarmasynyń qyzmetkerleri SES jáne quqyq qorǵaý organdarynyń qyzmetkerlerimen birlesip qalanyń dinı ǵımarattarynda sanıtarlyq normalardyń saqtalýyna monıtorıng júrgizetinin atap ótkim keledi», dedi Almaty qalasy Din isteri basqarmasy basshysynyń orynbasary.
Din isteri basqarmasynyń qyzmetkerleri Sanıtarlyq-epıdemıologııalyq baqylaý departamentiniń qyzmetterimen jáne quqyq qorǵaý organdarynyń qyzmetkerlerimen birlesip qalanyń ǵıbadat ǵımarattarynda sanıtarlyq normalardyń saqtalýyna monıtorıng júrgizetin bolady.
