О́ńirde toqsan saıyn aımaqtyń tildik ahýaly zerdelenip, bul maqsatta aımaqtaǵy atqarýshy organdardyń kiris-shyǵys qujattaryna monıtorıng jasalady. О́tken jyly memlekettik organdardaǵy qazaq tilindegi shyǵys qujattarynyń úles salmaǵy 99,2 paıyzdy quraǵan. Alaıda, basqarma basshysy óńirdegi bank júıesi men quqyq qorǵaý organdarynda is qujattarynyń basym bóligi orys tilinde júrgiziletinin atap ótti.
Sonymen qatar, jambyldyq turǵyndardyń tildik ahýalyna ótken jyly áleýmettik saýalnama júrgizilgen. Nátıjesinde, memlekettik tildi meńgergen halyqtyń úlesi 91,9 paıyzdy kórsetken. Al, 70,5 paıyzdyq úlesti memlekettik tilde erkin sóıleıtin, oqıtyn jáne jazatyn azamattar quraǵan. Orys tilin meńgergen turǵyndardyń úlesi 93,5 paıyzdy quraıdy. Sondaı-aq, aǵylshyn tilin biletin turǵyndar úlesi 27,7 paıyz bolyp otyr. Úsh tildi meńgergen turǵyndar úlesi 27,8 paıyz bolsa, memlekettik til normalaryna sáıkes keletin kórneki aqparatty qamtý dárejesi 76 paıyzdy quraǵan. О́z sózinde Rahııa Turmahanbetova Jambyl oblysynda til saıasatyn júzege asyrýǵa jergilikti bıýdjetten 157 mıllıon teńgeden astam qarjy bólingenin, byltyr memlekettik tildi meńgergen memlekettik qyzmetshilerdiń úlesi 48 paıyzdy qurap, 28 paıyzǵa artqanyyn jetkizdi. Sonymen qatar, memlekettik qyzmet kórsetetin uıym qyzmetkerleri 62,2 paıyzdy qurap, 26,7 paıyzǵa artqan. Sonymen qatar, ótken jyly úsh tildi oqytý boıynsha barlyǵy 3512 tyńdaýshy tegin oqý kýrstaryna jiberilgen bolsa, memlekettik tildi oqytýdan 2385 tyńdaýshy kýrstan ótken. Onyń ishinde 93,8 paıyzy ózge ult ókilderi.
Brıfıng barysynda basqarma basshysy aımaqta etnostardyń ana tilderin oqytý da jolǵa qoıylǵanyn, osy baǵyttaǵy oqytý boıynsha byltyr barlyǵy 142 adam qamtylǵanyn da atap ótti. Onyń ishinde 36 ázirbaıjan, 60 dúngen, 19 kúrdi, 16 balqar men 12 qyrǵyz bar. Al, qazaq tilin tildesý arqyly meńgertý, qazaq tilinde oıyn erkin jetkize bilýge jaqsy jaǵdaı jasalǵan. Bul rette TedX formatynda júrgiziletin barlyq aýdanda «SÓILE» klýbtary qurylǵan. Jyl ishinde «SOILE» klýbynyń 97 otyrysy ótken. Nátıjesinde, 1600-den asa ózge ult ókili memlekettik tilde erkin sóıleýge úıretetin tildik ortaǵa tartylǵan.
