Oblystyq tótenshe jaǵdaılar departamentiniń baspasóz qyzmeti habarlaǵandaı, aldyn ala jasalǵan daýyldy eskertýlerge qaramastan, óńir turǵyndary alys jolǵa shyǵyp jatyr. Tarbaǵataı, Kókpekti jáne Altaı aýdandaryndaǵy jol ýchaskelerinde 30-dan astam avtokólik qarǵa batyp qalǵan. Qutqarýshylar shuǵyl kómekke attanyp, 64 adamdy evakýasııalady.
«Eń qıyn jaǵdaı Altaı aýdanynda bolǵan. Qar qursaýynda qalǵan kólikterden 52 adam, onyń ishinde 6 bala qutqaryldy. Eshkim medısınalyq kómekke muqtaj bolǵan joq», dep habarlady vedomstvo ókilderi.
Kókpekti aýdanyndaǵy Baıbýra ýchaskesinde qutqarýshylar 3 avtokólikti qardan shyǵardy. Kólikterde 9 adam bolǵan.
«Osy rette óńir turǵyndaryna daýyldy eskertý jasalǵan kezde alys saparǵa shyqpaý qajettigin eskertemiz. Joldardyń jaı-kúıin «Dármen» mobıldi qosymshasy arqyly tekserip otyrǵan abzal. Eger jolda qıyn jaǵdaıǵa tap bolsańyz, dereý «112» nómirine habarlasý qajet», delingen málimette.
