Úkimet basshysynyń orynbasary Eraly Toǵjanovtyń qatysýymen ótken otyrysty Bilim jáne ǵylym mınıstri Ashat Aımaǵambetov «Pedagog mártebesi týraly» zań aıasynda pedagogterdiń eńbek jaǵdaıy jaqsaryp kele jatqanyn jetkizýden bastady.
«Pedagogterdi mindetine jatpaıtyn jumystarǵa, eseptilikke tartýǵa jol bermeý sharalary qabyldandy. Barlyq oblysta Pedagogterdiń quqyqtaryn qorǵaý jónindegi keńester ashyla bastady. Bıyl osy jumysty sońyna deıin jetkizemiz. 2024 jylǵa qaraı Memleket basshysynyń bergen tapsyrmasy sheńberinde pedagogterdiń jalaqysy 2 ese kóbeıedi. Keshendi sharalar mektepterdi kásibı kadrlarmen tolyq qamtamasyz etýge múmkindik beredi. Pedagogterdi jumysqa qabyldaý endi konkýrs arqyly, naqty biliktilik kórsetkishterine sáıkes júrgiziledi jáne biz ony elektrondy formatqa kóshiremiz», dedi A.Aımaǵambetov.
Pandemııanyń kesirinen mektepterdiń basym bóligi qashyqtan bilim berýge kóshti. Muǵalimder mundaı tosyn jaǵdaıǵa kásibı turǵyda tolyq daıyn bolmady. Osyǵan oraı mınıstrlik pedagogterdi qysqa merzimdi kýrstan ótkizdi. Bul kýrstar áli jalǵasyn tabady. Mınıstrdiń málimdeýinshe, qashyqtan oqytýdyń ádis-tásilderi boıynsha pedagogıkalyq ýnıversıtetterde pedagog mamandaryn daıyndaǵanda mindetti pán men mindetti modýl engiziledi jáne biliktilikti arttyrý kýrstarynda da osy másele boıynsha tıisti modýl qosylady.
Vedomstvo basshysy A.Aımaǵambetov sóz arasynda balabaqshalarǵa qatysty bir máseleni sheshý mindetine de toqtalyp: «3 pen 6 jastaǵy balalardy oqý jáne tárbıemen qamtý kórsetkishi 98,8 paıyzǵa jetti. Desek te 2-den 6 jasqa deıingi balalardy qamtý deńgeıi áli de 71%-dy quraıdy. Sondyqtan jekemenshik balabaqshalardy damytýdy yntalandyrý úshin biz vaýcherlik tetikti daıyndap jatyrmyz. Ony bıyl qanatqaqty rejimde bastap, kelesi jyly tolyǵymen barlyq júıege engizemiz», dedi.
Elimizde «Tegin kásiptik-tehnıkalyq bilim berý» jobasy jalǵasady. Kolledjderge de akademııalyq derbestik beriledi. 9 synyptan keıin kolledjge oqýǵa túsken stýdentter úshin oqý merzimi burynǵydaı 3,5 jyl emes, 2 jylǵa deıin qysqarady. 11 synyptan keıin kolledjge túskender úshin oqý merzimi 2,5 jyl emes, 1,5 jyldy quraıdy.
Al joǵary jáne joǵary oqý ornynan keıingi bilim berýde bıyl atqarylǵan eń negizgi jumys – grant qunynyń 340-420 myń teńgeden 1 mln teńgege deıin ulǵaıtylýy boldy.
«Bul óz kezeginde ýnıversıtetterge materıaldyq-tehnıkalyq jaǵdaıyn jaqsartýǵa jáne oqytýshylardyń jalaqysyn kóterýge múmkindik berdi. 2019 jyly qyrkúıekte mınıstrlikke qarasty JOO-da pedagogterdiń jalaqysy 20%-ǵa kóterilse, 2020 jyly qyrkúıek aıynda taǵy 20%-ǵa kóterildi. Áli de biz bul jumysty jalǵastyrýymyz qajet», dedi A.Aımaǵambetov.
Memleket basshysy Qasym-Jomart Toqaev halyqqa Joldaýynda Úkimetke jyl saıyn álemniń jetekshi ǵylymı ortalyqtarynda 500 ǵalymnyń taǵylymdamadan ótýin qamtamasyz etýdi, sondaı-aq «Jas ǵalym» jobasy aıasynda zertteý júrgizý úshin 1 myń grant bólýdi tapsyrǵan edi. Mınıstr A.Aımaǵambetov alqa otyrysynda bul tapsyrma týraly: «Taǵylymdama boıynsha «Bolashaq» halyqaralyq ortalyǵy aınalysady. Sonymen qatar «Jas ǵalym» jobasymen 1 myń grant bólýdi júzege asyrý úshin tıisti qarjy bólindi, bul jumys uıymdastyrylady», dedi.
