Jıynda «Tujyrymdama azamattardyń memleketpen ózara is-qımylyn jaqsartýǵa, memlekettik josparlaýdyń tıimdiligin, memlekettik qyzmettiń kadr quramynyń sapasyn arttyrýǵa, memlekettik qyzmetter kórsetýdiń belsendi formatyna kóshýge, retteýshilik jáne sybaılas jemqorlyqqa qarsy saıasatty jetildirýge, sondaı-aq sot jáne quqyq qorǵaý júıelerin transformasııalaýǵa baǵyttalǵan», dedi Anar Jaıylǵanova.
Memlekettik basqarýdyń jańa modeli «halyq únine qulaq asatyn», tıimdi, esep beretin, kásibı jáne pragmatıkalyq memleket qaǵıdattaryna negizdeletin bolady. Sondaı-aq Memlekettik qyzmet isteri agenttiginiń tóraǵasy tujyrymdamany iske asyrý sheńberinde talanttardy izdestirý jáne olardy respýblıkalyq deńgeıde memlekettik qyzmetke tartý jónindegi tetikter jetildiriletinin atap ótti. Budan bólek, memlekettik qyzmetke talantty jastardy tartý jáne memlekettik apparattyń áleýetin arttyrý úshin Prezıdenttik jastar kadrlyq rezervine irikteýdi odan ári júıeleý boıynsha jumys jalǵasatyn bolady. Atap aıtqanda, osy jyly Prezıdenttik rezervke ekinshi irikteý ótedi.
Memlekettik qyzmet problemalarynyń biri memlekettik organdarda beıindi jáne biregeı mamandardyń jetispeýshiligi bolyp qalýda, qajetti quzyretteri bar osyndaı adamdardy tartý úshin, merıtokratııa qaǵıdattaryn saqtaı otyryp, «pozısııalyq» modeldiń elementteri keńeıtiletin bolady. Irikteý rásimderin odan ári jetildirý kezinde kandıdattardyń, onyń ishinde jurtshylyq pen sarapshylardy tarta otyryp, kásibı jáne jeke quzyretterin baǵalaýǵa basa nazar aýdarylady.
Irikteýdiń barlyq kezeńderi avtomattandyrylady, bul irikteý prosesteriniń obektıvtiligi men ashyqtyǵyn qamtamasyz etedi, sondaı-aq kandıdattardy proaktıvti túrde izdeýdi júzege asyrýǵa múmkindik beredi. Taǵy bir jańashyldyq – kelisimsharttyq memlekettik qyzmetshiler ınstıtýtyn engizý. Bul memlekettik bastamalar men salalyq jobalardy iske asyrý kezeńinde arnaıy bilimi bar kásibı mamandardy tartýǵa múmkindik beredi.
Atalǵan mindetter personaldy basqarý qyzmetteriniń ókilettikteri men mártebesin qaıta qaraýdy jáne olardyń derbestigi men jaýapkershiligin arttyrýdy talap etedi. «Kadrlyq strategııa» jáne «kadrlyq josparlaý» sııaqty uǵymdar engiziletin bolady. «Kadrlyq jumystan adamı resýrstardy basqarýǵa kóshý personaldy basqarý qyzmetterin kúndelikti jumystan bosatýdy jáne olardyń qyzmetin sıfrlandyrýdy talap etedi. Osy maqsatta biz operasııalyq kadrlyq prosesterdi ońtaılandyrýǵa jáne avtomattandyrýǵa múmkindik beretin iQyzmet aqparattyq júıesin qurý boıynsha jumys júrgizip jatyrmyz», dedi A.Jaıylǵanova.
Brıfıng barysynda ortalyq pen óńirler arasynda bilikti mamandardy bólýdegi teńgerimsizdik (qabiletti kadrlar ortalyqta jumys isteýge tyrysady) jáne mınıstrlikterdiń memlekettik qyzmetshileriniń jergilikti jerlerdegi jaǵdaıdy bilýiniń jetkiliksizdigi baıqalatyny aıtyldy. Vedomstvo basshysynyń aıtýynsha, ortalyqta joǵary oqý ornynan keıingi bilimi bar memlekettik qyzmetshilerdiń úlesi óńirlerde uqsas kórsetkishten 4,6 ese joǵary (ortalyqta – 16,6%, óńirlerde – 3,6%); «Bolashaq» baǵdarlamasyn bitirýshiler – 29 ese (ortalyqta – 4,5%, óńirlerde – 0,2%); Memlekettik basqarý akademııasynyń túlekteri – 14 ese joǵary (ortalyqta – 5,3%, óńirlerde – 0,4 %). Osyǵan baılanysty, Agenttik ortalyq pen óńirlerdegi memlekettik qyzmetshilerdiń eńbek jaǵdaılaryn teńdestirý boıynsha birqatar is-shara ázirleýde. Bul, mysaly, ortalyq pen aımaqtar arasyndaǵy jáne memlekettik basqarý júıesindegi ıerarhııa arasyndaǵy jalaqydaǵy sáıkessizdikterdi azaıtatyn FBSh (faktorly baldyq shákil) júıesi.
Memlekettik apparattaǵy jumystyń tartymdylyǵy áleýmettik paketti qaıta qaraý esebinen de artatyn bolady.
«Sonymen birge, «jańa formasııa basshysy» baǵdarlamasyn iske asyrý arqyly transformasııalyq kóshbasshylar ınstıtýty damıtyn bolady», dedi agenttik tóraǵasy.
