Ǵajaıyp biregeı materıal 2019 jyldyń jazynda Tasqopa qorǵanyna júrgizilgen qazba jumystary kezinde, obanyń ońtústik baǵytyndaǵy 5,7 metr tereńdikten tabyldy. Arheologtar obanyń óte ejelgi dáýirde tonaýshylyqqa ushyraǵanyn anyqtady. Á. Marǵulan atyndaǵy arheologııa ınstıtýnyń dırektory Baýyrjan Baıtanaev, ǵylymı qyzmetker Arman Bısembaevtyń keńesteri negizinde, RF ǴA Materıaldyq mádenıet tarıhy ınstıtýtynyń restavratory Nıkolaı Kýrganov alǵashqy tazalaý, konservasııalaý jumystaryn júrgizdi. Munda shamamen 2500 jyl buryn ómir súrgen sarmat taıpasynyń kósemi ne jaýyngeri jerlengeni obadaǵy múrdeniń kıim qaldyqtarynan tabylǵan altyn túımeler, belbeý qaldyqtary, sadaq jebeleri salǵan oqshantaı, qanjar, naıza ushy dálel. Altynmen aptalyp jerlengen sarmat jaýyngeriniń teriden jasalǵan beldik qaldyqtary janyndaǵy sadaq jebelerin salatyn oqshantaı da altynmen qaptalǵany anyqtaldy. Túımelerde ejelgi adamdardyń nanym-senimine tán grıfondardyń bastary, altyn balyq, kún beınelengen.
Qazaqstannyń batys aımaǵynda ómir súrgen sarmat taıpasy kóseminiń obasy otandyq arheologııanyń ǵana emes, álemdik tarıhqa qosylatyn mol qazyna dep baǵalaıdy Á. Marǵulan atyndaǵy Arheologııa ınstıtýtynyń dırektory Baýyrjan Baıtanaev. Ǵylymı derekterge súıene otyryp, jerleý materıaldary negizinde Tasqopa kóseminiń rekonstrýksııasyn jergilikti sheberler –Bolat Atyraýbaev pen Erqosaı Ábilov ázirledi. Sondaı-aq qorǵannan tabylǵan jerleý zattary negizinde sadaq pen qoramsaq, jebeler, eki belbeý, shaǵyn qaltasha, qamshy kóshirmeleri jasaldy. Sarmat kóseminiń shalbary, jeıdesi, aıaq kıimi, kúrteshesi jáne bas kıimi qaıta tigildi.
«Aqtóbe oblysynyń kıeli jerleriniń geografııasy» aımaqtyq ǵylymı baǵdarlamasy aıasynda júrgizilgen arheologııalyq zertteýlerdiń Tuńǵysh Prezıdent N. Nazarbaevtyń «Bolashaqqa baǵdar: Rýhanı jańǵyrý» jáne «Uly dalanyń jeti qyry» baǵdarlamalyq maqalalary negizinde kóne tarıhty keshendi zertteý aıasynda júrgizilip otyrǵanyn aıtqan oblys ákimi Ońdasyn Orazalın aldaǵy ýaqytta da osy jumystardyń jalǵasatynyn málimdedi. Atap aıtqanda, Aqtóbe oblysynyń Dońyztaý-Ústirt aımaǵyndaǵy dinı-ǵuryptyq keshender, Muǵaljar aýdanyndaǵy Tóleýbulaq úńgirindegi ejelgi petroglıfter, Hromtaý aýdanyndaǵy Oısylqara jáne Mońǵolsaı qorymdaryna keshendi zertteý jumystary júrgizilip, kıeli jerlerdiń ensıklopedııalyq anqtamalyǵy shyǵarylady.
