Kezinde Igibaı Álibaev, Temirǵalı Qasenov, Ýahıt Temirbekov jáne t.b. aıtys súleıleri shyqqan óńir keıin bul ónerdi toqyratyp alǵan. Aıtys qaıta jandanǵan Táýelsizdik jyldary ǵana Erik Asqarov bastaǵan bir shoǵyr aqyndar oblys namysy úshin shyǵyp júrdi, biraq qanatyn keńge jaıa almady. Sóıtip, anda-sanda kóringen bir-eki aqyn bolmasa basqa jaǵynan bul óner bizde ábden turalap qalǵan edi.
Sońǵy jyldary bul halyqtyq óner Soltústikte, Qudaı kópsinbesin, qaıta samǵap, qulashyn keńge jaıyp keledi. Erik Asqarov atyndaǵy oblystyq aqyndar mektebi ashylyp, oǵan Mońǵolııadan kelgen talantty qandasymyz Jarqyn Juparhan basshylyq etip, tól ónerimiz irgesin bekite bastady. Basqasyn aıtpaǵannyń ózinde Jarqyn byltyrǵy karantın kúnderiniń ózinde televızııalyq aıtys uıymdastyryp, ol birneshe aıǵa sozylyp aıdy aspanǵa bir-aq shyǵarǵan. Aýrý kútip, ajaldan qorqyp, janshylyp júrgen jandardyń sanalary bir serpilip, rýhanı qýat alyp, bir jasańǵyrap qalǵan edi sonda. Oblystyń ózinen ǵana aıtysatyn 18 jas aqyn taýyp, arasynda úzilisin jasaı otyryp olardy bir-birimen aıtystyryp, aqyry fınalǵa da jetkizip, ondaǵy qazylyqtyń tóraǵalyǵyna aıtystyń aqtańgeri Júrsin Ermandy shaqyryp, Teristiktiń ataǵyn aspanǵa shyǵarǵan. Karantın kezinde osyndaı jobany abyroımen iske asyrǵany úshin J.Juparhanǵa Mádenıet mınıstrligi de óziniń alǵysyn bildirgen.
Odan keıin Jarqynnyń ózi 26 aqpan kúni Taraz qalasynda ótken «Jambyl – meniń jaı atym, halyq – meniń shyn atym» respýblıkalyq aqyndar aıtysyna qatysyp, júldeli 3-orynnyń báıgesi 300 myńdy qanjyǵasyna bókterip, oblysqa olja saldy.
Osy aıtysqa Jarqyn bekem daıyndalyp, Soltústik óńirdiń aqyn-jazýshylarymen jyr alybynyń qandaı baılanystary bolyp edi degen sııaqty dúnıelerdi zerttep, bizden de bir keńester aldy. Oǵan biz sol tusta «Egemende» jaryq kórgen «Jambyl men Sábıt» atty maqalany oqýǵa keńes bergenbiz. Sonymen birge Jákeń mýzeıiniń alǵashqy dırektory Qyzyljardyń týmasy, maıdanger, tórt ordenniń ıegeri, jýrnalıst Esilbaı Qazybekov bolǵanyn aıtqan edik...
Áıteýir dúbirli dodaǵa qatysqan 22 aqynnyń arasynan úshinshi oryn alý bizdiń óńir úshin úlken mártebe edi. Asanáli Áshimov bastaǵan ult zııalylary qazylyq etken bul aıtysta Jarqynnyń jarqyraı kóringenine máz bolǵanbyz.
Endi Jarqyn inimiz taǵy bir jarqyn bastama kóterip otyr. Jańa ǵana jóndeýden ótken oblystyq orys drama teatrynyń sahnasynda «О́leń sózdiń dańǵyly, bar qazaqtyń Jambyly» atty oblystyq aqyndar aıtysyn Naýryz merekesine oraı 20 naýryzda ótkizgeli otyr. Oǵan 12 aqyn qatyspaqshy.
Sanıtarlyq-epıdemıologııalyq talaptarǵa sáıkes bıletter zaldy toltyratyndaı emes, 30 paıyzdyq qamtýmen ǵana satylyp jatyr. Osy kúni qyzyljarlyqtardyń báriniń aýzynda osy aıtys júr. Osyndaı tamasha rýhanı serpilisterdi uıymdastyrýǵa muryndyq bolyp júrgen Jarqyn Juparhanǵa degen halyqtyń alǵysy sheksiz.
