Búginde ózi oqyǵan mektep pen Taraz qalasyndaǵy kóshe batyrdyń atymen atalady. Sondaı-aq oblystyq Polısııa departamentiniń aldyna Ǵazız Baıtasovtyń bıýsti ornatylǵan.
Aldaǵy sáýir aıynyń basynda, ıaǵnı batyrdyń týǵan kúnine oraı, oblys ortalyǵyndaǵy B.Momyshuly atyndaǵy «Jeńis» saıabaǵynda oblystyq polısııa departamentiniń bastamasymen jáne oblys ákimdiginiń qoldaýymen Halyq qaharmanyna eskertkish ornatylady. Osy maqsatta bılik jáne quqyq qorǵaý organdary ókilderiniń, depýtattar men batyrdyń týystarynyń qatysýymen eskertkishtiń irgetasy qalandy. «Ǵazız Baıtasov «Halyq qaharmany» joǵary ataǵyn alǵan birinshi jáne jalǵyz polıseı bolyp tabylady. Bizdiń bastamamyzǵa qoldaý bildirgeni úshin oblys jáne Taraz qalasynyń basshylyǵyna shyn júrekten rızashylyǵymdy jetkizgim keledi», dedi polısııa departamentiniń bastyǵy, general-maıor Janat Súleımenov. Sondaı-aq, jıynǵa batyrdyń jesiri Gúljamal Tájıeva men balalary da qatysty. «Men ózimniń jáne balalarymnyń atynan Ǵazızdi eske alýshylardyń barlyǵyna, eń aldymen onyń áriptesteri men jergilikti bılikke alǵys aıtqym keledi. Bizdi árqashan umytpaı, elep, eskerip, kóptegen is-sharalarǵa qurmetti qonaq retinde shaqyryp otyrady. Al, qaladaǵy «Jeńis» saıabaǵynan eskertkishtiń ashylýy onyń janqııarlyq erliginiń laıyqty baǵasynyń jáne kórsetilgen qurmettiń taǵy bir kórinisi dep bilemin», dedi Gúljamal Tájıeva.
Qyryq jasynda el tynyshtyǵyn kúzetý jolynda opat bolǵan Ǵazız Baıtasovtyń esimi máńgi el esinde. Batyrdyń ónegeli ómiri men janqııarlyq erligi jas urpaqtyń da tárbıesine úles qosatyny sózsiz.
Jambyl oblysy
