Tutynýshylar quqyǵyn qorǵaýshylar marapattaldy

Saýda jáne ıntegrasııa vıse-mınıstri Erjan Qazanbaevtyń aıtýyn­sha, bul baǵytta memleket pen úki­mettik emes uıymdar tize qosyp jumys istegende ǵana kedergilerdi eńserip, jetistikke qol jetkizedi.

– Elimizde osy tarapta 50-den astam qoǵamdyq birlestik jumys isteıdi. Olar tutynýshylyq quqyqtardy qorǵaý deńgeıin arttyrýǵa yqpal etedi. Bıyl aqpan aıynda mınıstrlik pen «Qazaqstan tutynýshylarynyń respýblıkalyq qaýymdastyǵy» birlestigi arasynda ózara yntymaqtastyq memorandýmyna qol qoıylǵan. 20 jyl boıy jumys istep kele jatqan qoǵamdyq birlestik basshylarynyń qoldaýynan úmittenemiz, – dedi vıse-mınıstr.

Is-shara aıasynda tutynýshylar quqyǵyn qorǵaý salasynda aıanbaı eńbek etip, osy salany damytýǵa úles qosqany úshin «Tutynýshylar lıgasy» qoǵamdyq birlestiginiń tóraıymy Baıan Ahmetjanova, tutynýshylardyń quqyqtaryn qorǵaý koalısııasynyń tóraǵasy Murat Ábenov, «Ádilet» qoǵam­dyq birlestigi tóraǵasynyń orynbasary Tursyn Jaǵyparova, «Atakent – Adam» qoǵamdyq birlestiginiń basshysy Sergeı Fedoseev, «Sapa» qoǵamdyq bir­les­tiginiń tóraǵasy Álikaqpar Mátishev jáne «Satybaldy» qoǵamdyq bir­les­tiginiń tóraǵasy Serik Momyshev ma­ra­pattaldy.

Tursyn Jaǵyparovanyń aıtýynsha, bul salada áli sheshimin tappaı turǵan másele kóp.

– Táýelsizdik alǵan 30 jylda bul salada úlken nátıjege jete almadyq. 2016 jyly zańǵa engizgen ózgeris bo­ıynsha tutynýshylar quqyǵyn qorǵap júrgenderge demeýshilik jasalmaıdy. Bul bir jaǵynan durys shyǵar. Keıbir úkimettik emes uıymdar kásipkermen birlesip ketip, tutynýshylardyń quqyǵy qor­ǵalmaı qalýy da múmkin. Biraq kez kelgen is alǵa jyljý úshin qarjy­lan­dyrý bolýy qajet. Onsyz sharýa sheshilmeıdi. Sondyqtan osy máseleni kóterip, qoǵamdyq birlestikter men mınıstrlik kóp túıtkildi talqylaýy qajet. Sodan soń biryńǵaı aqparattyq júıe de durys jumys istep turǵan joq. Qazir tutynýshylar problemasyn sheshetin jalǵyz organ – mınıstrlik jáne sonyń ishindegi komıtet. Endi jergilikti atqarýshy organdar úshin de yńǵaıly júıe jasap, jumys aýqymyn arttyrǵan jón, – deıdi «Ádilet» birlestiginiń ókili.

Jıyn qorytyndysy boıynsha mı­nıstrlik pen qoǵamdyq birlestik ókil­deri aı saıyn bir márte basqosý uıym­dastyryp, tutynýshylar quqyǵyn qorǵaý salasyndaǵy ózekti taqyryptardy talqylap, sonyń nátıjesi boıynsha ortaq sheshim qabyldap turýǵa ýaǵdalasty.